Ilir Daja mund të jetë trajneri i ri i Partizanit. Nuk është thjesht një hipotezë, por diçka që “gatuhet” në orët e fundit pas largimit të Skënder Gegës nga pankina e kuqe.
“Panorama Sport” raporton se drejtuesit e Partizanit shikojnë si pasuesin më të denjë në pankinën e kuqe pikërisht një trajner kampion si Daja, që sezonin 2018- 2019 e mbylli në krye të Flamurtarit. Mësohet se bisedimet e para mes palëve kanë nisur, por nuk mund të flitet për një akord zyrtar, pasi vetë Daja ka vendosur që të presë deri më 15 qershor, një datë që shënon edhe fundin e kontratës së tij me vlonjatët.
Pasi të respektojë deri në fund marrëveshjen me Flamurtarin, atëherë do të bëjë edhe lëvizjen e duhur. Por, duket se për Dajën ka një “derbi”, pasi në lojë është edhe Skënderbeu, paçka se për klubin korçar shumë gjëra varen nga vendimi që do të marrë KAS. Së fundmi, janë përfolur edhe bisedimet që Daja ka pasur me Kukësin, Teutën, por edhe klubin kosovar të Prishtinës.
PLANI I TAKAJT
Skënderbeu po përgatit skenarin e “çmendur” për sezonin e ardhshëm futbollistik. Nëse nga KAS-i do të vijë lajmi i madh për rikthimin në Europë, klubi ka gati një plan jo vetëm për stolin, por edhe pasurimin e organikës. Bardhekuqtë janë të fokusuar gjithë sy e veshë te mënyra se si do të shprehet Gjykata e Arbitrazhit Sportiv në Lozanë, ku presin që të zhbëhet dënimi 10-vjeçar i dhënë nga UEFA. Dhe sikundër pritet, përgjigjja e shumëpritur mund të vijë brenda datës 21 qershor (sipas afateve). Pavarësisht se ende nuk është përcaktuar me saktësi se çfarë fati do të ketë Skënderbeu, drejtuesit më të lartë të klubit kanë filluar të bëjnë projektin e merkatos.
/Panorama Sport/
