Skënderbeu fillon përgatitjet pa humbur kohë për sezonin e ri futbollistik. Pavarësisht dilemave të shumta që kanë korçarët përsa i përket vendimit që pritet të marrë KAS, kjo nuk i ka penguar drejtuesit për të hedhur themelet e para. Në raport me paraqitjen e këtij sezoni që la mjaft për të dëshiruar, bardhekuqtë duket se do t’i kushtojnë më shumë rëndësi rindërtimit të ekipit të ri, duke afruar disa lojtarë të rëndësishëm në pozicione kyçe.
Panorama Sport zbuloi dje ekskluzivisht se më afër Skënderbeut janë dy lojtarët më të mirë të Luftëtarit, Albano Aleksi dhe Behar Ramadani. Të dy mesfushorë që prej katër vitesh luajnë së bashku në ekipin gjirokastrit nuk kanë më kontratë me klubin e Luftëtarit dhe kësisoj në ndryshim nga ajo që ka ndodhur me Abazajn dhe Bregun, rruga e korçarëve është e hapur.
Gazeta mëson se palët parimisht kanë rënë dakord, teksa mbetet vetëm hedhja e firmës në kontratë, që do të vonojë disi, pasi gjërat janë të lidhura me vendimin që do të marrë KAS për të ardhmen e klubit bardhekuq.
/Panorama Sport
