Nga boldnews.al
Emri i tij është ndër më të njohurit për strukturat e rendit. Pesë herë e kanë prangosur për vepra të rënda penale, por mjaft lehtësisht ai falej nga drejtësia jonë, për tu rikthyer përsëri në rrugë, ndoshta për të regjistruar ngjarjen e radhës kriminale.
Në orët e para të mëngjesit të sotëm grupi i Forcave Operacionale të Policisë së Tiranës arrestoi Gjergji Cukalin, 40 vjeç të dyshuar si autor i ekzekutimit të Arben Bilalit, ish-punonjës i policisë, i vrarë pak muaj më parë afër banesës së tij në Selitë të Tiranës.
“Sektori i Hetimit të Krimeve Ndaj Jetës dhe Pronës, në D.V.P.Tiranë, në bashkëpunim me Prokurorinë e Rrethit Gjyqësor Tiranë, në lidhje me ngjarjen e ndodhur në datë 30.01.2019, ku në rrugën ‘Isuf Banka’’në Tiranë, është vrarë me armë zjarri shtetasi A.B. (Arben Bilali), 50 vjeç, pas një pune të mirëorganizuar është arritur të bëhet zbulimi dhe dokumentimi ligjor i kësaj ngjarje, ku është bërë kapja dhe ndalimi i autorit të dyshuar: Gj.C. (Gjergj Cukali), 40 vjeç, lindur dhe banues në Tiranë, i dënuar më parë për veprat penale të “Prodhimi dhe shitja e narkotikëve’”, “Armëmbajtja pa leje” dhe “Rrëmbim personi”-thuhet në reagimin zyrtar të policisë së Tiranës.
Kanë qenë provat materiale, kryesisht gjurmë gishtash të lëna në një objekt në vendin e ngjarjes që çuan në arrestimin e Cukalit. Por përtej zbulimit, emri i 40-vjeçarit qarkullonte në regjistrat policor si person me disa precedentë të rëndë penal, por në mënyrë të dyshimtë, në çdo rast ka mundur që të bëjë vetëm pak kohë burgim dhe rikthehet në liri, për tu përfshirë në veprën tjetër të radhës.
Për herë të parë Cukali u përball me drejtësinë në vitin 2006, kur u dënua me akuzën e heqjes së paligjshme të lirisë ndaj shtetasit Fajton Demirlika në vitin 2004. Dënimi i dhënë ndaj Cukalit ishte dhjetë vjet burg, por për shkak të disa amnistive dhe lirimit të parakohëshëm për “sjellje të mirë”, Cukali rifitoi lirinë.
Sërish policia do e procedonte, kur më 20 gusht 2012 u kap nga patrulla e Policisë me një armë zjarri pistoletë pa leje dhe me një krehër me 17 fishekë. Pak kohë pa qelitë e burgut dhe në fund u gjet i lirë. Nuk ishte e thënë që Gjergj Cukali, i njohur edhe si “i forti” i rrugës “myslym Shyri”, të kthehej në “rrugën e mbarë”… Në një operacion të detajuar antidrogë, nga hetimet e prokurorisë u zbulua një grup në trafikun e lëndëve të forta narkotike, kryesisht kokainë. Në pranga përfunduan disa persona, përfshi edhe Cukalin, në korrik të vitit 2016, pasi dyshohej se ai ishte furnizuesi kryesor i shpërndarësve të drogës.
Edhe pse nuk janë mbushur as tre vjet nga kjo ngjarje, Cukali rifitoi lirinë, edhe pse akuzohej për trafik të lëndëve narkotike në kuadër të grupit të strukturuar kriminal.
Mëngjesin e sotëm 40-vjeçarit iu vendosën sërish prangat, këtë herë për akuzën e rëndë: “Vrasje me dashje e kryer në bashkëpunim dhe mbajtje pa leje të armëve luftarake”. Mbetet për tu parë provat që ka prokuroria, pasi nga marrja në pyetje Cukali ka mohuar autorësinë, apo pjesëmarrjen në ekzekutimin e ish-policit të FNSH-së Arben Bilali.
