Kristi Vangjeli ndërron totalisht destinacion, duke udhëtuar drejt një kontinenti të largët siç është Australia. Mbrojtësi i Skënderbeut, një ndër të vetmit që ka treguar rritëm të lartë edhe gjatë këtij sezoni që lamë pas, është pranë një transferimi mjaft të rëndësishëm.
“Panorama Sport” zbulon ekskluzivisht nga burime pranë klubit korçar, se Vangjeli së fundmi është futur në bisedime me klubin e Superligës australiane, Adelaide Junajtid. Nga sa bëjnë me dije burimet pranë lojtarit, Vangjeli ka udhëtuar një ditë më parë drejt Selanikut në Greqi duke mbyllur më pas një fluturim drejt Australisë gjatë fundjavës.
Korçari pritet që fillimisht të firmosë një kontratë vetëm për tre muaj me ekipin australian, që do të thotë deri në fund të muajit gusht, kur dhe mbyllet sezoni në “A-League”.
Zyrtarizimi i transferimit do të bëhet sapo Vangjeli të mbërrijë në Australi. Me sa duket mbrojtësi kërkon të hapë një kapitull të ri në karrierë, me shpresën për të vazhduar edhe jetën me familjen në kontinentin e largët.
Vangjeli disponon edhe pasaportë greke dhe kjo ia lehtëson shumë gjërat për të lëvizur. Gjithsesi, pasi të firmosë zyrtarisht me Adelaide Junajtid, do të flitet më mirë për të ardhmen e mbrojtësit. Pra, ai do të shohë fillimisht sesi do të shkojë kjo aventurë e shkurtër tek Adelajde, duke shpresuar se do të ketë më pas mundësinë për të pasur ndonjë kontratë më afatgjate. Në rast të kundërt, atëherë vangjeli do të presë sesi do të rrjedhin ngjarjet në Korçë. Nëse klubi merr një lajm të mirë nga KAS, sigurisht që shpresat për të vazhduar karrierën me Skënderbeun mbeten. Por, në rast të kundërt, atëherë është e sigurt që edhe pas tre muajsh Vangjeli nuk do të rikthehet në Korçë, pasi kërkon të tjera alternativa për të ardhmen, për më tepër që është në një moshë që mund t’i thotë “stop” futbollit. Kjo pak a shumë është situata e “senatorit” të Skënderbeut.
/Panorama Sport
