Hapja e fushatës zgjedhore të Rilindjes na ktheu edhe njëherë shumë vite pas, në vitet e ‘Heroit të Punës Socialiste’.
Kush ka lindur para viteve 90-të ka dëgjuar për ‘Heroin e Punës Socialiste’ Adem Rekën, i cili ditën e pushimit shkoi në punë pasi nuk e linte ndërgjegjja të pushonte sepse stuhia kishte ‘pushtuar’ Durrësin.
Atë ditë Adem Reka u martirizua, pasi humbi jetën duke punuar në emër të partisë dhe idealit. E pikërisht për këtë flijim, partia i dha atij titullin ‘hero i Punës Socialiste’, madje për të bëri edhe film.
Po filmin tjetër ‘Dollia e Dasmës Sime’, ku dhëndri braktis nusen ditën e dasmës dhe shkon e u bashkohet partizanëve.
Sigurisht që heronjtë e komunizmit ishin mite, të cilët diktatura i ngrinte lart, për të ndërgjegjësuar popullin, se përpara vinte partia, e më pas familja e atdheu.
E njëjta gjë ndodhi edhe ditën e sotme, ku dhëndri i ri Gazment Paja, do të ‘braktiste’ të bukurën e dheut në ditën e dasmës, e do t’i bashkohej hapjes së fushatës, madje dhe do të deklaronte me krenari: Se këta djem e vajza do të shkruajnë historinë, dhe unë dua të jem pjesë e saj.
Pra Rilindja ja arriti më në fund qëllimit, që 30 vjet pas përmbysjes së komunizmit të beje votime me 1 parti-shtet dhe disa kandidatë, të ngjashëm me frontin demokratik dhe bashkimet profesionale, të ringrejë edhe njëherë mitin e ‘Heroit të Punës Socialiste’.
Sot Gazi i Luftarit, zbuloi se ëndrra e tij kur të rritej e të bëhej aktor i madh, nuk është të luajë përkrahë Al Pacinos, e as Robert De Niros, por të aktrojë e luaj në krahë të Edi Ramës në filmin me titull ‘Partia mbi të gjitha, gruaja e ka radhën pas’.
Për këtë heroizëm dhe shërbim të madh, partia e futi Gazin në listat e këshilltarëve bashkiakë, me premtimin për ta bërë deputet në të ardhmen, ashtu siç shpërbleu Erjonin e Ersekës, duke e kandiduar për kryetar bashkie. /Boldnews.al
