Pasi siguruan vendin e katërt në renditje, korçarët duket se kanë filluar menjëherë me plotësimin e ekipit për sezonin e ardhshëm. Të bindur te një kualifikim i mundshëm në Europë dhe me shpresë të plotë te vendimi i KAS-it, Skënderbeu duket i motivuar për të ndërtuar një ekip me qëndrueshmëri më të madhe se ai i sezonit që kaloi dhe mbi të gjitha, me objektivin për t’u futur sërish në garën e titullit.
Duke parë këtë projekt që vijon nga ana e klubit, gjithçka do të nisë me rinovimin e lojtarëve që kanë qenë pjesë e sezonit të sapombyllur. Burime pranë klubit bëjnë me dije se kanë qenë drejtuesit e klubit ata që kanë filluar të thërrasin grupe–grupe lojtarët për të biseduar rreth rinovimit dhe kushteve të reja të kontratës.
Të parët që kanë hyrë në listën e presidentit Ardjan Takaj, për të diskutuar rinovimin, kanë qenë portieri Aldo Teqja, mbrojtësi Leonit Abazi dhe mesfushori Bruno Dita. Të tre këta futbollistë janë njoftuar nga Takaj për të mbërritur në “Tropikal Resort”, në mënyrë që të diskutojnë kushtet e kontratës së re dhe kohëzgjatjen e saj.
Nëse dy të parëve kontrata u skadon në qershor dhe rinovimi duhet me patjetër, ndryshe qëndron puna për mesfushorin. Bruno Dita ka edhe të paktën 6 muaj kontratë me Skënderbeun dhe në këtë mënyrë, ky takim bëhet me qëllimin e zgjatjes të kontratës ekzistuese.
Në kushte të tilla nuk bëhet me dije ende nëse lojtarët kanë shkuar për të biseduar rinovimin apo diçka e tillë do të ndodhë në ditët në vijim. Por, ajo që vlen të theksohet është fakti se do të jetë thjesht çështje kohe dhe një bisedë e shkurtër mes palëve për të arritur akordin. Pasi të përfundojë rinovimin me tre futbollistët e parë, diçka e ngjashme do të ndodhë edhe me pjesën tjetër të ekipit.
TRATATIVAT- Duket se në listën e lojtarëve ekzistues tratativat më të vështira për të arritur rinovimin për sezonin e ardhshëm do të jenë me tre futbollistë. Kristi Vangjeli, Marko Pervan dhe Kuasi Sibo. Të tre duket se do të presin deri në fund vendimin e KAS para se të hedhin firmën në kontratë. Në kushtet kur Vangjeli e ka pranuar në një dalje publike diçka të tillë, është lënë që rinovimi i tij të diskutohet pasi të dalë vendimi i KAS-it.
Vetëm atëherë pritet që Vangjeli të bashkohet me ekipin nëse diçka pozitive del për Skënderbeun. Në të njëjtën situatë qëndron pjesa e dytë të huajve. Skënderbeu mund të tentojë sërish formulën e huazimit për lojtarët dhe për këtë duhet të arrijë një akord me klubin. Nga ana tjetër, nëse KAS shprehet pozitivisht, nuk përjashtohet edhe mundësia e blerjes.
KAS-I- Jo vetëm në rastet e mësipërme, por KAS po mban peng edhe merkaton në hyrje për bardhekuqtë. Korçarët dukshëm e kanë të lidhur veprimin në merkato me vendimin e KAS-it, pasi gjërat do të ndryshojnë mjaft në varësi të verdiktit final.
Gjithsesi, duke u nisur nga ky fakt, pritet që deri në momentin që KAS-i do të shprehet, të mos ketë asnjë afrim në radhët e Skënderbeut, por vetëm rinovime me grupin ekzistues. Vetëm pasi të bëhet publik vendimi i KAS-it, korçarët do të jenë më të qartë sesi do të veprojnë në merkato.
/PANORAMASPORT.AL/
