Sot u raportua se nga Holanda kanë ardhur informacione apo dosje për 4 kryebashkiakë, që kërkojnë një tjetër mandate, lidhur me dënimet e tyre penale.
Lajmi u publikua nga A2 CNN, ndërsa u emetua në disa prej mediave në vend.
“Prokuroria e Përgjithshme ka në dorë dosjet për 4 kryetarë bashkish, të kapur në shkelje me formularin e dekriminalizimit. Në kulmin e konfliktit politik për mbajtjen e zgjedhjeve vendore më 30 qershor, autoritet holandeze dorëzojnë pranë organit qendror të akuzës, dosjet me vendime penale për katër kryetar bashkie në vend”, raportonte A2CNN.
Ndaj lajmit në fjalë nuk kishte asnjë reagim zyrtar nga Prokuroria e Përgjithshme, as konfirmim dhe as mohim. Por lidhur me të ka reaguar Sekretari i Përgjithshëm i PS-së, Taulant Balla, i cili e ka cilësuar një fake-neës. Menjëherë pas reagimit të Ballës lajmi është fshirë nga faqja online e televizionit.
Lajmi i fshirë nga faqja e A2 CNN
Prokuroria e Përgjithshme ka në dorë dosjet për 4 kryetarë bashkish, të kapur në shkelje me formularin e dekriminalizimit. Në kulmin e konfliktit politik për mbajtjen e zgjedhjeve vendore më 30 qershor, autoritet holandeze dorëzojnë pranë organit qendror të akuzës, dosjet me vendime penale për katër kryetar bashkie në vend.
Mësohet se disa prej tyre janë listuar në zgjedhjet e ardhshme, duke kërkuar një mandate 4-vjeçar. Konfirmohet zyrtarisht që dosjet për katër kryebashkiakët i janë dorëzuar prokurores së përgjithshme. Emrat e tyre nuk bëhen publikë, ndërsa pritet që të kryhet ballafaqimi me formularët e dekriminalizimit të plotësuar prej tyre. Këto materiale do t’i nënshtrohen verifikimit dhe nëse Prokuroria i drejtohet Komisionit Qendrorë të Zgjedhjeve.
Dosjet konsiderohen ende si sekret dhe nuk jepen detaje në lidhje me informacionet që përmbajnë ato, nëse janë vendime penale apo dokumente që përfshinë drejtuesit vendorë në veprime antiligjore në vendet e huaja. Mësohet se sektori i verifikimit të integritetit në Prokurorinë e Përgjithshme i është drejtuar me kërkesë disa shteteve për informacion mbi subjektet që kanë deklaruar se kanë jetuar në një shtet të huaj.
A do të përbëjë ky fakt një problem për sa kohë jemi në start të fushatës elektorale? Në mars të vitit 2017, ish-kryeprokurori Adriatik Llalla kërkoi ndërprerjen e mandateve për dy kryetarë bashkish, atë të Tepelenës dhe Poliçanit, por pas dy vitesh hetimet ndaj tyre stopuan edhe pse dyshimet për akuzat ndaj tyre ishin të rënda.
Reagimi i Ballës
Edhe pse me emrin e madh të CNN nga mbrapa, A2 nuk i shpëtoi dot “konkurencës” lokale kush prodhon më shumë fake-neës. I bëj thirrje këtij televizioni të përgënjeshtrojë këtë lajm të pavërtetë. Ja pse Shqipëria ka nevojë të menjëhershme, ashtu siç bëri BE, për rregullime ligjore kundër fake-news.
