Dëshmitari që telefonoi mbrëmjen e djeshme në emisionin Pa Gjurmë dhe kërkoi para në këmbim të gjetjes së vogëlushes Bleona Mata, ka reaguar sërisht sot, duke pranuar se një ditë më parë kishte mashtruar.
Mbrëmjen e djeshme, është dhënë një dëshmi tronditëse për Bleona Matën nga një person maqedonas, i njohur si Mehmet Xheladi.
Ai deklaroi se vajza mbahet në Maqedoni nga dy persona dhe ka ndërruar shumë herë vendodhjen.
Mirëpo, gjatë pasdites së sotme, në një lidhje me stafin e emisionit “Pa Gjurmë”, kërkoi ndjesë publike, madje tha se ishte gati që të kthente lekët që i kishte marrë Bukurie Matës, vetëm që të mos e denonconte, pasi nëna e Matës paralajmëroi se do i drejtohet policisë.
“Unë jam Meti, pashë në incizimet e juaja që më keni akuzuar dhe do të më denonconi në polici, unë kërkoj falje, më vjen shumë keq për këtë rast, nuk di si ta shpjegoj, kam qenë në gjendje shumë të keqe, jam penduar, e kam bërë për lekë.
Kam probleme psikike, jam marrë me drogë dhe e kam bërë për lekë. E di si është dhimbja dhe kur të bëhem baba do ta kuptoj.
I kërkoj shumë falje zonjës Bukurie, jam aty cfarë do ajo, i kam borxh jetën. Kërkoj shumë falje.
Ato lekë që m’i ka dërguar Bukuria, unë ia kthej lekët, vetëm të mos më denoncoj në polici”, tha ai.
