Prej orës 19:00 ministra dhe deputetë socialist, që njëkohësisht janë drejtues politik sipas qarqeve, janë mbledhur në një darkë informale nga kryeministri Edi Rama, në prag të çeljes së fushatës nga Rilindja për zgjedhjet e 30 qershorit.
Rama ka mbledhur të ftuarit e tij, që njëkohësiht janë edhe më të besuarit, në vilën 31, ku zakonisht janë zhvilluar mbledhje dhe takime të kryeministrit actual, për krijime koalicionesh apo marrëveshje me aleatë të tij të dikurshëm.
Sot Rama duket se do të përcaktojë atë se çfarë socialistët do të bëjnë në një fushatë ku mungon opozita dhe kur procesi ka pikëpyetje të mëdha.
Zyrtarisht fushata nis më 1 qershor, ndërsa një ditë më pas Rama do të udhëtojë drejt Lezhës ku do të prezantojë Pjerin Ndreun si kandidat për kryebashkiak.
E ndërsa sot, të përzgjedhurit apo besuarit e Ramës, janë mbledhur një nga një në vilën që më parë ishte marrë në mbrojtje nga Garda e Republikës dhe policia.
Një pjesë e të pranishmëve kanë preferuar që të ecin në këmbë për disa metra, me përjashtim të ministres së Shtetit, Elisa Spiropali që ka zbritur nga makina luksoze pothuajse te dera e jashtme e vilës 31.
Mirela Kumbaro, ish-ministre e Kulturës, dhe Etilda Gjonaj, ministre e Drejtësisë, sipas fotove të bëra publike nga LSA, duket se kanë një shoqëri të mirë. Ato janë kapur me dorën në qafë, teksa ecin disa metra.
Bashkim Fino ka preferuar të konsumojë një cigare puro, teksa shkon në këmbë drejt darkës, ku ndoshta Rama mund të thotë atë që nuk e pohon publikisht, ndoshta përgatitjen për zgjedhje të parakohshme. /BN/
