Opozita e Bashkuar ka ndyshuar datën e protestës së shtatë kombëtare. Mësohet se opozita ka vendosur që protesta e radhës të mbahet me datë 2 qershor, në orën 19:00.
Kujtojmë këtu se më parë ishte paralajmëruar se protesta e radhës do të ishte ditën e premte me datë, 31 maj. Megjithatë, ndryshimi ka ardhur pasi 31 maji përkon me Natën e Kadrit, thanë burime nga opozita. Sipas besimit islam: Nata e Kadrit ndodhet në muaj e Ramazanit dhe është e vlefshme sa 1.000 muaj. Veprat që bëhen në këtë muaj, sipas fesë islame, quhej sikur ti kesh bërë për 1000 muaj.
Nga ana tjetër, edhe kryeministri Rama një ditë më parë lajmëroi se PS do të shtyjë hapjen fushatës zgjedhore, në datën 1 qershor.
Tensionet mes palëve politike sa vijnë e shtohen me afrimin e 30 qershorit, data e dekretuar nga Presidenti Ilir Meta për zhvillimin e zgjedhjeve lokale. Opozita e bashkuar, që ka dorëzuar mandatet prej kohësh, ka refuzuar pjesëmarrjen në zgjedhje. Nga opozita kërkohet largimi i kryeministrit Edi Rama dhe krijimi një qeverie tranzitore për të garantuar zgjedhje të lira e të ndershme. Ndërsa shefi i qeverisë është shprehur se zgjedhjet do të zhvillohen më 30 qershor dhe ende nuk ka asnjë shenjë nga ai, për të plotësuar kërkesën e opozitës për dorëheqje.
Për zgjidhjen e krizës politike, Presidenti Ilir Meta ka shprehur gatishmërinë për shtyrjen e datës së zgjedhjes. Edhe partnerë të Shqipërisë, si koalicioni qeverisës në Gjermani CDU-CSU, janë shprehur se palët se palët duhet të dialogojnë dhe dorëheqja e Ramës si kryeministër apo shtyrja e zgjedhjeve nuk duhet të shihen si tema tabu. /bn/
