Partizani festoi sot titullin kampion, me një festë madhështore të organizuar në sheshin “Nënë Tereza” pas ngritjes së trofeut.
Ndërkohë pas festës, nëpërmjet një lidhje direkte për emisionin “Zona Gol” në supersport, presidenti i Partizanit, Gazmend Demi, tregoi emocionet e titullit si dhe nuk nguroi të zbulonte planet për të ardhmen e klubit. Numri 1 i 16 herë kampionëve të vendit, shpreson që skuadra e tij të përsëris suksesin e Skënderbeut në Europë.
Sa herë e kishit ëndërruar të vinte kjo ditë, që të festonit titullin e 16 kampion?
Kishte disa kohë që më thoshin se jemi për titull, por nuk e besoja, pasi që të fitosh, duhet edhe eksperiencë. Kishim 3 vite që e lakmonim titullin, ndërsa këtë sezon ia dolëm ta bëjmë tonin.
Edhe sot ndaj Kukësit nuk humbët, duke e bërë edhe më të bukur festën e titullit…
Më erdhi mirë që nuk humbëm as sot dhe tani do të mund të festojmë një titull të fituar me shumë mund nga të gjithë.
E vështirë të fitosh, por edhe më e vështirë të mbrosh titullin…
E vërtetë, pasi menjëherë pasi të mbarojë festa, do të fillojë puna për përgatitjet për Europën, por edhe për sezonin e ri, Unë shpresoj që të luajmë sa më shpejt në shtëpinë tonë, ndërsa me të tjerat merret drejtori Olsi Rama dhe stafi i tij.
Çfarë prisni nga Europa?
Shpresojmë që të kemi edhe pak fat me vete dhe të bëjmë një përfaqësim sa më të mirë edhe në arenën europiane. Pse jo, të përsërisim suksesin e Skënderbeut.
A ishte një nga ngjarjet më të mira të jetës tuaj, ky titull?
Është një ngjarje e rëndësishme dhe shumë e mirë, por nuk di të them a është më e mira.
Tirana është shumë pranë mbijetesës, ju gëzon ky fakt?
Pa diskutim që po. Unë e kam thënë gjithmonë që bukuria e Superiores është pikërisht derbi i kryeqytetit. Janë dy skuadra historike, që i kanë dhënë shumë futbollit shqiptar dhe një përballje e tillë nuk mund t’i mungojë kampionatit. Shpresoj që bardhebluve t’u shkojë mirë edhe në javën e fundit.
A mund të themi se po hidhen bazat për të krijuar një Partizan të ngjashëm me Skënderbeun e viteve të fundit?
Unë e kam thënë gjithmonë që këto 7-8 vitet e fundit Skënderbeu ka bërë diçka madhështore, ndonëse për histori është më mirë Partizani. Në angazhimin tim në këtë sport, më ka pëlqyer shumë ajo që kanë bërë korçarët dhe do të doja shumë që jo vetëm të arrinim atë nivel, por të shpresonim edhe për më shumë.
Ju gëzon fakti që 4 futbollistë janë gëzuar në Kombëtare?
Pas titullit, ky është aspekti i dytë që më gëzon nga ky sezon. Kjo sepse rritet edhe vlera e klubit, por mbi të gjitha shpërblehet edhe mundi e djersa e atyre djemve, që kanë dhënë më të mirën këtë vit.
