Bashkim historik zemrash dhe mendjesh, e ka cilësuar protestën e sotme, kreu demokrat Lulzim Basha.
Në një fjalim drejtuar mijëra qytetarëve të pranishëm, Basha tha se këtë shesh i pushtuar si asnjëherë tjetër, janë bashkuar zemrat dhe mendjet e shqiptarëve, dëgjojmë shpresën e një kombi të ngritur në këmbë.
“Është mbushur ky shesh me kurajojë dhe vendosmëri”, tha Basha, ndërsa nga mbështetësit e opozitës janë dëgjuar thirrjet “E duam Shqipërinë si gjithë Europa” dhe “Rama ik”.
Kreu demokrat tha se kjo është aspirata dhe ky është misioni që kanë shqiptarët, të këtij zgjimi kombëtar, që kërkojnë zbatimin e parimeve të Europës.
Basha tha se nuk ka Europë duke vjedhur zgjedhjet dhe duke mos ndëshkuar ato që vodhën zgjedhjet me në krye Edi Ramën.
“Bashkimi ynë është për Shqipërinë si gjithë Europa.
Në këto 6 vjet Rama mbolli krim, korrupsion, papunësi dhe dhunë ndaj qytetarëve shqiptarë. Ndaj kam një mesazh nga populli: Rama ik.
Ky është mesazhi i sovranit, ka shpresë, bashkim, pjesëmarrje, ky është mesazhi i qytetarëve të bashkuar, për të larguar shkaktarin e krizës më të thellë, njeriun që për pushtetin e tij futi krimin në Parlament, njeriun që asgjesoi dhe shkatërroi Gjykatën Kushtetuese dhe të Lartë, që kapi Prokurorinë dhe i shërben krimit të organizuar, Rama ik.
Njeriut që i vodhi paratë popullit më të varfër dhe ia dha ato një grushti oligarkësh dhe kriminelësh, Rama ik.
Rama u soll si një kriminel ndaj popullit të tij, duke i shembur banesat, duke i dhunuar, duke i hedhur gaz, madje edhe fëmijëve të vegjël”, tha Basha.
Sipas tij, ky mesazh është çlirimi i Shqipërisë nga krimi, i ekonomisë nga krimi, i çlirimit nga një grusht zuzarësh që kanë marrë peng të ardhmen tonë.
