Kreu i opozitës Lulzim Basha, deklaroi në mbyllje të protestës së sotme, se opozita dhe shqiptarët nuk tërhiqen deri në fund nga beteja kundër së keqes.
Ai i ka bërë thirrje Ramës të largohet dhe ti hapë rrugë zgjidhje politike dhe mos provokojë shqiptarët, ndryshe e pret përmbysja popullore.
‘E duam Shqipërinë si gjithë Europa, me këtë thirrje e kemi nisur marshimin tonë në 16 shkurt, për të kulmuar sot në pjesëmarrjen më masive në këto 29 vite. Ky bashkim nuk do të fiket deri sa beteja me të keqen të fitohet deri në fund. Çdo ditë e më shumë protestat tona bëhen edhe më të mëdha, bashkimi i shqiptarëve bëhet edhe më i vendosur. Mesazhi i sotëm ishte i prerë ndaj miqve dhe armiqve të demokracisë, se ne jemi gati të sakrifikojmë gjithçka për votën e lirë. Ne jemi populli i Europës dhe nuk do të pranojmë despotizmin antiamerikan të një bande kriminelësh që kanë marrë peng vendin, kanë kapur drejtësinë dhe kanë bllokuar rrugëtimin tonë drejt Europës. Sot japim këtë mesazh të qartë dhe të vendosur: Betejën e nisëm për Shqipërinë si gjithë Europa. Europa e dëgjoi zërin tonë, tani është koha për zgjidhjen politike, largimin e Edi Ramës, qeveri tranzitore dhe zgjedhje të lira dhe të ndershme. Ky bashkim i jashtëzakonshme, ka forcën, vendosmërinë dhe qartësinë për ta çuar këtë betejë deri në fund. Ne nuk do të pranojmë kurrë më dhunën në kutitë e votimit, s’do të pranojmë paligjshmërinë e një qeverie të dalë nga zgjedhje të vjedhura, nuk do të pranojmë më zgjedhje antikushtetuese kriminale të këtij kryeministri të kapur në krim. Jemi gati që sëbashku me të gjithë faktorët e përgjegjshëm, të hapim rrugën e zgjidhjes politike, duke bërë të mundur largimin e shkaktarit të bllokimit të Shqipërisë, dhe përmes një qeverie tranzitore për zgjedhjet e lira dhe të ndershme, dhe një qevere të dalë nga vota e popullit dhe për popullin. Ky kushtim është dëgjuar dhe është mbështetur nga miqtë tanë, tani jemi të gjithë bashkë, dhe ai është i vetëm dhe i pa shans përballë bashkimit tonë. Orët e tij të fundit qofshin orët e reflektimit të thellë për ata që mendojnë se mund ta mbajnë peng qeverisjen e këtij vendi. Forca jonë është përballja, dhe përballje do të ketë deri në fitoren e kësaj beteje. Ne jemi gati ta çojmë këtë betejë deri në fund, por kështu paralajmërimi se kush mendon se me dhunën e krimit do të thyejë këtë vendosmëri, gabohet rëndë dhe e pret vetëm përmbysja popullore’, tha Basha.
