Lulzim Basha, kryetar i PD-së, tha gjatë një takimi me emigrant shqiptarë në Londër se beteja që ka nisur opozita dhe qytetarët në Shqipëri do t’i japë fund tranzicionit 30 vjeçar shqiptar.
Duke shprehur bindjen se kjo rrugë do t’i çojë shqiptarët drejt një ndryshimi historik, Basha tha se ka një padurim që ky ndryshim të vijë një orë e më parë.
“Mirënjohje të thellë për pjesëmarrjen masive dhe entuziaste që më nderoni mua dhe delegacionin që më shoqëron në Londër.
Dhe t’ju them se e ndjeva këtë mikpritje të ngrohtë që në orët e para të fluturimit nga Tirana në Londer, që kur mbërrita në aeroport i rrethuar nga dhjetëra bashkatdhetarë.
Të gjithë, ndryshe nga më parë, ishin plot shpresë e besim se rrugëtimin që kemi nisur do ta çojë Shqipërinë në një ndryshim historik e demokratik që do të përmiresojë jetën e shqiptarëve ne Shqipëri e kudo ku ata jetojnë. Në vetvete përbën nje frymëzim të jashtëzakonshëm per opozitën.
Vendosmëria, entuziazmi dhe shpresa qe e kam prekur kudo në Shqipëri, e gjeta edhe me të ndezur tek shqiptarët e Londrës.
Ka një padurim të madh që ndryshimi të ndodhë sa më shpejt, jo për të ardhur PD në pushtet, por për të patur të gjithë mundësitë për të jetust përmes ounës së ndershme. Kjo është beteja që luftojmë sot. Ata që mendojnë se kjo është luftë për pushtet, ndodhen vetëm në sipërfaqen e një vullkani zemërimi që zien shumë thellë.
Si ka mundësi 30 vjet ne jemi të fundit, sepse me gjasa edhe Maqedonia do të nisë bisedimet?
Si ka mundësi që pas 30 vjetesh shqiptarët e kërkojnë emde fatin jashtë vendit? Zemërimi është i ligjshëm sepse është marrë peng parlamenti, duke marrë peng parlamentin, merret peng qeverisja, duke shkaktuar krizë të thellë ekonomike.”, u shpreh Basha.
Në vijim ai shtoi se në 30 qershor nuk do të ketë zgjedhje me Edi Ramën Kryeministër.
“Zgjedhje më 30 qershor, me Ramën kryeministër nuk do të ketë. Nuk ka gjykatë kushtetuese, nuk ka gjykatë të lartë. Nuk ka asnjë garanci ligjore. Kriza thellohet edhe më shumë se prokuroria është kthyer në repart.
I është dashur Britanisë shekuj të tërë për të ndërtuar një sistem demokratik vlerash. Për ti ruajtur ato ky popull ka bërë sakrifica. Janë këputur koka mbretërish. Me vullnetin e popullit nuk luhet, sa herë mbreti futet në parlament për të prezantuar qeverinë e re, i përplaset dera.
Është një ceremonial sa herë që Elitzabet e Dytë hyn në parlament, për të kujtuar se themeli i demokracisë qëndron pikërisht te ndarja e pushteteve. As mbreti dhe askush nuk mund të ketë të gjitha pushtetet. Kjo është garancia për pavarësinë e gjykatave britanike”, deklaroi Basha.
Në herët në një komunikim live, përpara nisjes së takimit, kreu demokrat tha: “në vijim të vizitës time në Parlamentin britanik dhe instuticionet e qeverisë britanike, ndodhem sot në takimin më të bukur, në takimin me bashkëatdhetarët tanë, të cilët e kanë mbushur plot këtë sallë.
Janë mbledhur të lajmëruar në një kohë shumë të shkurtër, por nuk mungon entuziazmi dhe shpresa për ndryshimin që po vjen. Do të zhvillojmë një bashkëbisedim jo vetëm për takimet e mia në londër, por edhe për të diskutuar problematikat dhe zgjidhjet për qytetarët tanë në emigracion”.
