I riu Mikel Kasaj, i arratisur nga gjykata e Vlorës një vit më parë, është vënë në pranga në Greqi. Kasaj, sipas policisë greke, u arrestua në Athine si pjesëtar i një grupi që akuzohet për grabitje të armatosura në pika karburanti dhe banesa.
Në këtë operacion u arrestuan gjithsej 6 shtetas shqiptarë dhe 2 grekë. Gjatë operacionit policia sekuestroi ndër të tjera një automatik kallashnikov, dy pistoleta dhe një revolver, si dhe një sasi prej më shumë se 1 kg kanabis.
Ndërkohë sic raportojnë edhe mediat greke, Zoungla.gr, Kasaj gjatë momentit të arrestimit është konfrontuar me policinë duke i kërkuar atyre të bëjnë kujdes me fjalët dhe mënyrën si sillen pasi ai është një person i famshëm në Shqipëri.
-“Mendon se do më kapësh mua? E di ti se kush jam unë
– Jo, pse duhet ta dimë se kush je?- i përgjigjet polici.
– Shikoni në youtube për emrin tim dhe do ta merrni vesh se kush jam…’ është përgjigjur një nga të arrestuarit.
Në atë moment policët kanë kuptuar nga pamjet se bëhej fjalë për Mikel Kasaj i cili u arratis në mënyrë spketakolare nga salla e gjykatës së Vlorës më 23 maj të vitit të shkuar, menjëherë sapo u shqiptua dënimi ndaj tij me 3,4 vite burg. Kasa ishte akuzuar për pengmarrje.
