Humbja e fundit me Teutën ka qenë mjaft e rëndë për Skënderbeun. Në një ndeshje thelbësore për objektivin sezonal, korçarët nuk kanë ditur të përfitojnë për të mbajtur ekipin në ujërat europiane, por janë dorëzuar pa kushte përballë Teutës.
Gjithsesi, humbja në këtë takim ka shkaktuar acarim në Korçë nga mënyra sesi erdhi. Bardhekuqtë, ndryshe nga herët e tjera, janë kthyer të akuzojnë gjykimin. Dy golat e shënuar nga Teuta janë dukshëm në pozicion të parregullt dhe kjo nuk mund të pranohet në një ndeshje “finale”. Nga ana tjetër, bardhekuqve u mungon edhe një penallti për një prekje të topit me dorë nga ana e Bicajt në minutën e 41-të, kur ekipi ishte në humbje 0-1.
Trajneri Orges Shehi ka mbajtur qetësinë pas ndeshjes, por më pas ka akuzuar. “Është e papranueshme diçka e tillë. Po na bëjnë që të hedhim djersën kot.
Janë dy raste evidente. Nuk e kuptoj, por po na dëmtojnë”, ishin fjalët e trajnerit bardhekuq për gazetën. Natyrisht që diçka e tillë nuk kishte ndodhur më herët me Skënderbeun, por duket se faktet janë bindëse se Skënderbeu është ndëshkuar.
