Partizani kampion pas 26 vitesh. Për herë të fundit e kishte fituar këtë trofe në vitin 1993. Sa shumë gjëra kanë ndryshuar që atëherë…
– President i klubit të Partizanit ishte italiani Stefano Salvati.
– Trajner ishte Sulejman Starova.
– Kapiten ishte Adnand Ocelli.
– Skënder Gega atëherë ishte 30 vjeç dhe luante në Gjermani me Sportefreunde Siegen.
– Alban Hoxha ishte 6 vjeç në atë kohë.
– Atanda ishte 3 muajsh, ndërsa Mala, Hyseni, Hebaj, Bardhi, Asani, Ferati, Kardozo, Mensah, Çinari dhe Kote nuk kishin lindur akoma.
– Nuk kishte akoma celularë.
– Tirana nuk ishte e mbytur nga pallatet.
– President ishte Sali Berisha.
– Kryeministër ishte Aleksandër Meksi.
– Kryetar bashkie në Tiranë ishte Sali Kelmendi.
– President federate nuk kishte, FSHF DREJTOHEJ NGA Sekretari i Përgjithshëm, Eduart Dervishi.
– Ishin në modë makinat tip “Peugeot” i kuq ose “FIAT”. “Mercedesi 240” ende nuk kishte pushtuar Shqipërinë.
– Çokollatat e preferuara ishin “Hilal”, ndërsa çamçakëzët që i gjeje kudo ishin “Turbo”.
– Mijëra shqiptarë tentonin ilegalisht të shkonin në Greqi, Itali dhe vende të tjera të Europës për një jetë më të mirë.
NGJARJET POLITIKE
– Ish-udhëheqësi komunist, Ramiz Alia, u dënua dhe u burgos për korrupsion.
– Nexhmije Hoxha u dënua me nëntë vite burgim për përvetësim të fondeve shtetërore.
– Ish-kryeministri Vilson Ahmeti u vendos nën arrest shtëpie, pas akuzave për korrupsion.
– Manfred Uorner, Sekretari i Përgjithshëm i NATO-s vizitonte Tiranën.
– Shqipëria njihte zyrtarisht Republikën e Maqedonisë.
– Papa Gjon Pali II bën një vizitë historike.
– Shqipëria dëbonte një klerik ortodoks grek, i cili akuzohej se kishte shpërndarë harta që tregonin Shqipërinë e jugut si territor grek. Greqia më pas deporton mijëra punëtorë emigrantë të paligjshëm shqiptarë.
– Lideri i Partisë Socialiste, ishkryeministri Nano, është arrestuar me akuzat për shpërdorim të pushtetit.
