Një kampion pa shumë çudira dhe bëma. Partizani ishte si një makineri perfekte që nuk i la asgjë rastësisë, por nga java në javë mori rezultatet falë kompaktësisë dhe vazhdimësisë.
Dhjetë lojtarë dhanë kontribut për golat e titullit, Belica luajti më shumë nga të gjithë dhe Ibrahimi u ndëshkua me kartonë. Ja sekretet e “demave” në këtë sezon të shkëlqyer. Titulli është i merituar plotësisht, sepse e thonë edhe numrat. DHJETË
GOLEADORË
Te skuadra e Partizanit nuk kishte një lojtar që dalloi nga të tjerët për golat e shënuar, edhe pse Jasir Asani ishte ai që mban titullin e goleadorit të ekipit. Mesfushori shënoi 8 herë duke kaluar Telushin me 7 gola.
Në total, rrjetën e gjetën 10 lojtarë nga ekipi i Skënder Gegës. Pas dy të parëve, renditen Bardhi dhe Mensah me nga 5 gola dhe pastaj Çinari, Mala, Rebaj (4). Belica, Duka dhe Ardit Hila shënuan nga 1 gol në këtë sezon. Ekipi i kuq u paragjykua për mungesën e një lojtari bomber që shënon gjithmonë dhe udhëheq ekipin në momentet e vështira, por ia doli që të fitonte titullin kampion.
BELICA SI ROBOT
Ndodh gjithmonë që lojtarët me më shumë minuta dhe me aktivizime të jenë portierët, por te Partizani i këtij titulli nuk është Alban Hoxha futbollisti më i aktivizuar.
Është mbrojtësi Egzon Belica ai që ka luajtur më shumë, 30 ndeshje dhe 2700 minuta. Portieri Hoxha është ndalur në 29 ndeshje dhe 2586 minuta. “Maratonomaku” i tretë është Esat Mala me 2554 minuta të luajtura në 30 ndeshje.
