Nga Dako te Sejdini/ Kë nuk rikandidoi Rama për zgjedhjet bashkiake

Janë tetë kryebashkiakë të Partisë Socialiste që nuk do të rikandidojnë në zgjedhjet lokale të 30 qershorit. Emrat ‘big’ janë padyshim ato të Vangjush Dakos dhe Qazim Sejdinit që sunduan Durrësin dhe Elbasanin për të paktën 12 vite.

Valbona Sako dhe Gledjan Llatja janë përzgjedhur nga Edi Rama si kandidatë për bashkitë e Durrësit dhe Elbasanit, ndërkohë që roli i Dakos dhe Sejdinit në përcaktimin e emrave raportohet se ka qenë vendimtar.

Florjana Koka nuk do të rikandidojë gjithashtu për bashkinë e Sarandës. Ajo u zgjodh në këtë detyrë në vitin 2015-të dhe sipas raportimeve të kohës, ishte ish-deputeti Koço Kokëdhima që e propozoi si kandidate të PS për qytetin bregdetar.

As Muharrem Rama nuk do të jetë pjesë e garës së 30 qershorit. I zgjedhur kryebashkiak i Peshkopisë në 2016-ën, pas skandalit ku u përfshi paraardhësi i tij, Shukri Xhelili, Rama nuk arriti të jetë asnjëherë një figurë dominuese në strukturat e PS. Në garë për zgjedhjet e ardhshme do të jetë Dionis Imeraj.

Artur Bardhi do të mbahet mend si kryebashkiaku i Partisë Socialiste me katër emra. Gential Lila, Altin Tanushi apo Gent Bushi, sido që të quhet, kryebashkiaku aktual i Kurbinit nuk do të garojë për një mandat të dytë.

Të njëjtin fat kanë patur edhe Luljeta Dollani në Gramsh, Durim Rroshi në Memaliaj dhe Ardian Kokomani në Shijak.

Lista e kryebashkiakëve të PS që nuk rikandidojnë

1. Bashkia Peshkopi – Muharrem Rama nuk rikandidon. PS zgjedh Dionis Imeraj.
2. Bashkia Durrës – Vangjush Dako nuk rikandidon. PS zgjedh Valbona Sakon.
3. Bashkia Elbasan – Qazim Sejdini nuk rikandidon. PS zgjedh Gledjan Llatjan.
4. Bashkia Gramsh – Luljeta Dollani nuk rikandidon. PS zgjedh Klodian Taçen.
5. Bashkia Kurbin – Artur Bardhi nuk rikandidon. PS zgjedh Majlinda Carën.
6. Memaliaj – Durim Rroshi nuk rikandidon. PS zgjedh Gjolekë Gucin.
7. Sarandë – Florjana Koka nuk rikandidon. PS zgjedh Ardian Gurmën.
8. Shijak – Ardian Kokomani nuk rikandidon. PS zgjedh Elton Arbanën.

Lexo edhe: 

*Zyrtarizohen kandidatët për zgjedhjet bashkiake/ Rama: Çfarë pritet të ndodhë nesër…

*Zëvendësojnë kandidatët, kush janë deputetët e rinj të PS që pritet të futen në parlament

*Korrupsion, blerje votash dhe drogë/ Kush është kandidati i Ramës për Dibrën që hetohet nga Prokuroria

*Kush është ish-aktori i “Portokallisë’ që Rama e ka zgjedhur të garojë për postin e kryebashkiakut