Nga Boldnews.al
Sa herë ndodhet ngushtë, kryeministri Rama tenton të nxjerrë në skenë çështjen e patriotizmit të shtirur. Nuk është e largët koha kur në një shfaqje të shpifur edhe estetikisht, kreu i qeverisë u shfaq në Pejë si “babai” i shqiptarisë. Ishte datë 27 nëntor e vitit të kaluar kur Rama me ministrat e tij mbajtën mbledhjen e përbashkët me qeverinë e Kosovës.
Hodhi një firmë mbi flamur me një foto “zyrtare” me ministra “patriotë” që me dy duar bënin simbolin e shqiponjës dhe mendoi se me këto pamje dhe foto kishte bërë një nga gjestet më mbresëlënëse. Se shqiptarët e Shqipërisë, shqiptarët e Kosovës apo edhe diaspora, do e stamponte atë moment për ta mbajtur si frymëzim patriotizmi.
Ai ekip ministror që sipas tij do bënte të mundur “bashkimin kombëtar”, jo në heqje kufijsh, por bashkim kulturor, ekonomik dhe në çdo fushë tjetër, nuk është më. Vetëm tre javë më vonë, gjysmën e “ministrave patriotë” i shkarkoi si të paaftë…
Sot Edi Rama në Kosovë është politikani më i urryer shqipfolës. Gjithçka lidhet me një projekt të tij, bashkë me presidentin Thaçi dhe presidentin Vuçiç, që synonte ndarjen e Kosovës, e prej andej do vinte paqja e madhe sipas tyre. Kjo ide është konsideruar tepër e rrezikshme nga BE, veçanërisht Gjermania e cila u artikulua prerazi se kjo nuk do të lejohet pasi çdo ndryshim kufijsh rrezikon të kthejë Ballkanin në zonë të rrezikshme konfliktesh. Ka hasur në qëndrimin e fortë edhe të kryeministrit Ramush Haradinaj, që iu desh që krahas “luftës” politike me presidentin serb Vuçiç, të përballej edhe me Ramën e Thaçin në Berlin.
Projekti që deri tani ka mbetur si ide e treshes Rama-Thaçi-Vuçiç, është që Mitrovica e Veriut ti kalojë Serbisë, ndërsa Kosova të përfitonte një pjesë nga Lugina e Preshevës. Shumica qytetare reaguan kundër, duke kërkuar që të mos preket asnjë milimetër kufijve të shtetit të Kosovës, të fituara me luftë dhe gjak, asokohe kur Edi Rama, sot kryeministër, shëtiste plazheve nudiste të Francës.
Po nuk është vetëm kjo arsyeja që Rama është kryeministri më i urryer i të gjitha kohërave në Kosovë. Një vit më parë, vendosi taksë në Rrugën e Kombit. Çdo qytetar i Kosovës apo Shqipërisë që kalon në atë rrugë duhet të paguajë 5 euro hyrje dhe 5 dalje. Gjithashtu në Samitin e Berlinit presidenti i Francës Mannuel Macron tha se nuk mund të liberalizohen vizat me Kosvën, pasi kanë pasur një precedent mjaft negativ me Shqipërinë.
Është statistikë që tremb ajo që ka shënuar kryeministri Edi Rama. Në gjashtë vite qeverisje të tij janë larguar nga vendi 450 mijë qytetarë shqiptarë. Shumica kanë kërkuar azil në një nga vendet e BE-së, për shkak të kushteve mjaft të vështira ekonomike, por veçanarisht mungesa e shpresës dhe arrogancës së madhe qeveritare. Ky emigracion masiv i shqiptarëve pengoi edhe qytetarët e Kosovës për të lëvizuar të lirë.
Ramën nuk e shpëton asnjë klithje boshe që tenton shitjen për patriot, thjesht është një person “non grata” (i padëshiruar) nga qytetarët e Kosovës, por edhe të Shqipërisë, që tashmë gjithnjë e më të shumtë po dalin në protestë për rrëzimin e tij.
