Të paktën katër fut bollistë janë piketu ar për t’u nxjerrë në merkaton e verës nga klubi i Skënderbeut. Bëhet fjalë për futbollistë si Oto Xhon, Blerim Krasniqi, Nazmi Gripshi dhe Jorgo Pëllumbi, të cilët janë piketuar nga menaxherët e ekipit bardhekuq si futbollistë të përshtatshëm për klube europiane.
Burime të sigurta pranë klubit treguan dje për “Panorama Sport” se këtij grupi lojtarësh nuk përjashtohet mundësia t’u shtohen edhe futbollistë të tjerë, njëri prej të cilëve është edhe Dejvi Bregu.
I njëjti burim ka bërë me dije se që tani menaxherët e skuadrës korçare kanë piketuar lojtarë të cilët priten të veshin fanellën korçare për sezonin e ri. Natyrisht, bëhet fjalë për futbollistë që do të jenë të gatshëm të luajnë për Skënderbeun në Kupat e Europës, gjithnjë nëse KAS i hap dritën jeshile klubit bardhekuq.
Kjo politikë sportive dhe financiare njëherazi tregon se Skënderbeu nuk është thjesht një skuadër futbolli, por një institucion që funksionon më së miri, duke ruajtur raportet e të ardhurave me shpenzimet.. Të katër futbollistët e Skënderbeut duke qenë lojtarë të rinj në moshë mbeten më të kërkuarit e momentit nga merkatoja e verës. Burimet nuk bëjnë me dije ekipet me të cilat menaxherët janë në bisedime, por ajo që është e sigurt nga këta katër lojtarë, dy prej tyre vështirë se do të luajnë më për Skënderbeun.
KUASI SIBO
Nga ana tjetër, veç merkatos në dalje, korçarët po përgatiten edhe për afrimet e reja në sezonin e ardhshëm, por mbi të gjitha për konfirmimin e disa elementëve që kanë dhënë shenja të mira në këtë vit. Një prej lojtarëve të piketuar nga klubi është Kuasi Sibo. Mesfushori ganez i Skënderbeut ka tërhequr prej kohësh vëmendjen e klubit bardhekuq, që po kërkon me çdo kusht ta mbajë edhe për sezonin e ardhshëm.
Konfirmimi i Sibos kalon përmes bindjes së ekipit të Uatfordit, që disponon kartonin e lojtarit. Bisedimet duhet të zhvendosen fillimisht mes klubeve dhe një gjë të tillë më parë e ka bërë të ditur edhe vetë lojtari. Në të tilla kushte, korçarët në fund të këtij sezoni do të ulen në tryezën e bisedimeve me anglezët për të tentuar marrjen e futbollistit në fjalë. Tashmë mbetet vetëm përfundimi i sezonit, për mbi të gjitha vendimi i KAS, që po mban pezull Skënderbeun.
Hapja e dritës jeshile për ekipin bardhekuq për pjesëmarrje në aktivitete europiane do të thotë një tjetër strategji, me drejtuesit që do të mendojnë për forcimin e skuadrës, në mënyrë që të përballojë ndeshjet ndërkombëtare. Gjithsesi, rëndësi për momentin në klub ka fakti që të shpallet vendimi sa më shpejt, pasi çdo zvarritje thuajse minon të gjitha planet afatshkurtra të drejtuesve. Strukturat e Skënderbeut janë të ngritura prej kohësh dhe tashmë mjafton sinjali pozitiv nga KAS për të nisur një rrugë tjetër të suksesshme.
/Panorama Sport/
