Humbja ndaj Kukësit pa bërë rezistencë tregoi edhe një herë formën e Skënderbeut pa “senatorët” në fushë. Mungesat e befasishme të Vangjelit dhe Muzakës dëshmuan se skuadra mbetet pa bosht dhe e ka të vështirë që të reagojë. Edhe pse luhej ndeshja më e rëndësishme e sezonit, që mund t’u jepte shansin për të marrë trofe dhe shkuar direkt në Kupat Europës, ekipi nuk ishte i orientuar në fushë dhe i mungonte optimizmi për të bërë mirë. Këtë fakt e konstatoi edhe vetë trajneri Orges Shehi, i cili pas ndeshjes pranoi vështirësinë për të luajtur pa dy lojtarë “kyç” të formacionit. Në të tilla kushte, problem mbetet pjesa e mbetur e sezonit.
Të vendosur para kësaj situate dhe mbi të gjitha kur janë edhe 360 minuta për t’u luajtur, kërkohet me ngulm rikuperimi i lojtarëve thelbësorë për ndeshjen ndaj Teutës. Gjë që deri diku duket e vështirë. Kristi Vangjeli me siguri do të jetë gati, edhe pse gjithçka varet nga gjendja e tij nëse do ta kalojë shpejt gjendjen gripale. Por, hall më vete është dëmtimi i Gjergji Muzakës.
DËMTIMI
Mesfushori i Skënderbeut është dëmtuar para fillimit të takimit kundër Kukësit, e për pasojë ka humbur ndeshjen e dytë gjysmëfinale. Një tërheqje muskulore në rrëzë të kofshës e la Muzakën jashtë formacionit dhe stolit. Por, ende nuk dihet nëse do të jetë i gatshëm për takimin e radhës. Nga kontrollet e bëra ditën e djeshme rezultoi se shkalla e tërheqjes është e lehtë dhe koha e rikuperimit nuk do të jetë shumë e madhe për lojtarin në fjalë. Gjithsesi, sipas të dhënave që vijnë nga klubi, të tilla dëmtime minimalisht kërkojnë të paktën 7 ditë kohë për rikuperim.
Dhe nëse ndodh kështu, 34-vjeçari vë në rrezik praninë e tij në javën e 33-të të kampionatit. I kontaktuar nga gazeta, stafi mjekësor i klubit bardhekuq bën me dije se ,pavarësisht kohës së rikuperimit që shkon gati një javë, do të bëhet çmos që Muzaka të kthehet brenda pak ditësh dhe Shehi ta ketë të gatshëm për Teutën. Skënderbeut i duhen me patjetër pikë të plota në këtë takim dhe një mungesë e Muzakës do të komprometonte llogaritë e trajnerit, por edhe Europës. Si të mos mjaftonte kjo, Skënderbeu duhet të shpresojë që edhe Vangjeli të jetë gati për këtë ndeshje, në mënyrë që ekipi të jetë më i plotë për takimin e së dielës. Kujtojmë se për të kapur Europën, korçarët duhet të jenë në vendin e tretë në renditje, që aktualisht mbahet nga Flamurtari. Për këtë duhet që edhe vlonjatët të ndalen në rrugën drejt finishit.
MORALI
Humbja me Kukësin dhe eliminimi nga Kupa duket se e kanë rritur akoma më shumë ngarkesën psikologjike te Skënderbeu. Lojtarët kanë hyrë të demoralizuar në dhomat e zhveshjes dhe në sytë e tyre vërehej normalisht zhgënjimi. Kjo është një pjesë tjetër që ekipi duhet të punojë më shumë për të rikthyer besimin te futbollistët, veçanërisht te të rinjtë.
/PANORAMASPORT.AL/
