Pas eliminimit nga Kupa e Shqipërisë, Skënderbeu duhet t’i bëjë mirë llogaritë me kampionatin. Nëse duan që të kapin direkt një vend në zonën “Euro”, duhet të blindojnë vendin e tretë, në të kundërt do luten që trofeu më i rëndësishëm në vend të jetë i Kukësit, ekip që i mposhti në gjysmëfinale me rezultatin final 2-5.
Vetë Orges Shehi e ka të qartë se situata është komplikuar, gjë që e pranoi direkt pas ndeshjes. Në deklaratën e dhënë për mediat, ai i vendosi një “ultimatum” vetes dhe ekipit për javët e fundit. Ai kërkon 3 fitore në total, pa llogaritur trepikëshin që kanë në tavolinë përballë Kamzës.
Por, për ta bërë këtë, Shehi është i vetëdijshëm se duhet fillimisht të rikuperojë Vangjelin dhe Muzakën. “Ne kemi tri ndeshje dhe duhet t’i fitojmë patjetër këto që kemi përpara. Duhet të shkojmë kudo për të fituar. Luajmë me dy ekipe në fushën tonë dhe një herë në transfertë. Duhet të marrim pikët e plota dhe të shohim për të përfituar nga gabimi i kundërshtarëve. E them këtë, pasi nuk varet gjithçka nga ne.
Nëse më pas nuk renditemi dot të tretët, por do të jemi në vendin e katërt, do të bëjmë tifo për Kukësin që të fitojë Kupën e Shqipërisë, me qëllim që të na lirojë vendin e katërt, i cili na çon në Europë. Në kampionat shpresojmë që të rikuperojmë Muzakën dhe Vangjelin dhe sigurisht që duhet të jemi maksimumin tonë. Duhet të bëjmë punë të madhe psikologjike, pasi lojtarët i kam parë shumë të tronditur. Duhet të jemi të përqendruar dhe të punojmë shumë me anën psikologjike”, theksoi Shehi pas skualifikimit nga Kupa./PANORAMASPORT.AL
