Kryeministri Edi Rama, njëherësh kryetar i Partisë Socialiste të Shqipërisë ka flakur në kosh listën e propozimeve të shkuara nga dega e PS Shkoder për emrin e mundshëm si kandidat për kryetar të bashkisë së këtij qyteti, në zgjedhjet e 30 qershorit.
Mësohet se gjatë diskutimeve të gjata të zhvilluara ditën e premte, Rama ka qënë i prerë në emrin e prefektit të ri Valdrin Pjetri, duke mos pranuar asnjë alternativë të dhënë nga socialistët Shkodranë, që propozuan 4 emra që të shkonin në tryezen e numrit një të partisë.
Burime për shkodranews kanë bërë me dije se ashtu si në deklarimet e mëparshme, Rama ka qënë i prerë kur ka thënë se të vetmit emra që do të merrte në konsideratë, janë ato të deputeteve aktual, që pranojnë të lënë mandatin e të hyjnë në garë, duke ju referuar në këtë rast më së shumti kryesuesit të qarkut Ditmir Bushati.
Por ky i fundit sic e ka shprehur edhe më herët se nuk e do një sfidë të tillë, i ka lënë rrugë të hapur prefektit Pjetri që të jetë i përzgjedhuri i Ramës. Kështu kryesocialisti ka përjashtuar propozimet e anëtarësisë që bënë për këtë post, të emrave si: ish kryetari i deges Arvit Osja, biznesmenin Pjerin Fusha dhe Artan Banushin. Me sa duket Rama preferon të luajë me karta politike dhe jo vetëm, prandaj në këtë mes ardhja e Pjetrit nuk ka qënë rastësore, e aq më pak promovimi që ai shpejtoi në pak ditë ti bëjë vehtes.
Tashmë nuk dihet nese Valdrin Pjetri do të mbajë deri në fund postin e prefektit, apo do ti duket që në këtë kohë kaq të shkurtër të dorehiqet për ti hapur rrugë dikujt tjetër në këtë karrige dhe ai të përveshë mëngët për fushatë. Megjithatë sfida duket interesante, pasi vetë rivalet politik, ndonëse vijojnë të deklarojnë mos hyrjen në zgjedhje, nuk përjashtojnë surprizat në fushatën zgjedhore që e majta parashikon të nisë.
Një grup pune po punon për CV e çdo kandidati, duke gjetur pikat e dobëta ku do ta sulmojnë, e në këtë mes nuk do të mbetet pas as prefekti kandidat Pjetri. Me interes pritet të shihet në Shkoder edhe pozicionimi i opozites së re të krijuar në vend, që ka deklaruar hyrjen në zgjedhje./ShkodraNews
