Partizani dhe Tirana do të ndeshen të dielën në “Selman Stërmasi” për herë të 153-të në historinë e tyre. Ky takim parashikohet të jetë i veçantë për të kuqtë, që me shumë mundësi mund të sigurojnë edhe matematikisht titullin kampion, trofe i cili u mungon nga maji i vitit 1993.
Duke e parë si një ngjarje të veçantë, për vetë mungesën e gjatë të titullit, por edhe shtrirjes gjeografike të dashamirësve të Partizanit, derbi i së dielës parashikohet të jetë një festë mbarëkombëtare për të kuqtë. Për të mos e humbur këtë moment, mësohet se kanë nisur organizimet e tifozëve anembanë vendit, por edhe në Kosovë dhe Maqedoni. Për dashamirësit nga Kosova, udhëtimi është i garantuar nga organizatorët dhe u sigurohet edhe bileta falas për hyrjen në stadium. Përmes postimeve në rrjetet sociale, nga të katër anët e vendit, dashamirësit e kuq publikojnë punën organizative dhe në derbi pritet që të ketë tifozë nga Saranda deri në Kosovë.
MASAT E SIGURISËGjatë paradites së djeshme, në ambient e stadiumit “Selman Stërmasi” është zhvilluar një mbledhje për punën organizative të derbit. Të pranishëm kanë qenë përfaqësues të dy klubeve të kryeqytetit, zyrtarë të FSHF-së, përfaqësues të kompanisë së sigurisë dhe drejtuesit e stadiumit. Në këtë takim janë caktuar detyrat e posaçme për secilin klub, ku Partizani do të ketë barrën e organizimit të takimit si skuadra pritëse.
Për vetë rëndësinë që ka ky takim, siguria do të jetë në shkallën maksimale. Rreth 130 stjuartë do të angazhohen për derbin dhe në gatishmëri të lartë do të jetë edhe policia e kryeqytetit. Uniformat blu do të angazhohet në mbarëvajtjen e marshimeve të dy tifozërive dhe do të jenë në gatishmëri në perimetrin e jashtëm të stadiumit gjatë ndeshjes. Sendet e palejueshme për tifozët do të jenë si në derbet e shkuara, ndonëse asnjëherë nuk është parandaluar hyrja e tyre në stadium. Edhe në mbledhjen e djeshme është konfirmuar ndarja e sektorëve të tifozërisë, ku duke qenë miq në derbi, bardheblutë do të kenë në dispozicion tribunën qendrore A dhe tribunë H, kryesisht për ultrasit. Sipas marrëveshjes, sektori D2, që quhet tribuna e “Fanatics”, do të mbetet bosh, duke ditur se është Partizani organizator i derbit.
