Që në krijimin e saj u përfol shumë si një parti fantazëm e cila plotëson kushtet e ‘të mëdhenjve’ duke shërbyer si gjasme parti e re për pluralizmin politik ne vend.
Megjithatë, edhe pas regjistrimit të saj si parti apo edhe në KQZ, ky institucion vendosi që ta deklarojë të ligjshëm regjistrimin dhe brenda afateve e partisë së Patozit.
Ishte Partia Bashkimi Demokrat Shqiptar, me kryetar Ylber Valterin ajo që depozitoi në Kolegjin Zgjedhor ankimin në të cilin kërkoi çregjistrimin e Partisë “Bindja Demokratike”.
Në argumentet ligjore, Partia Bashkimi Demokrat Shqiptar theksonte se vendimi i gjykatës i paraqitur në KQZ nga ‘Bindja Demokratike’ nuk kishte marrë formë të prerë.
“Vërtetimi i gjykatës, i paraqitur në KQZ nga Bindja Demokratike nuk ka marrë formë të prerë. Duke futur në garë, në kundërshtim me ligjin për partitë dhe Kodin Zgjedhor, organizata politike të paregjistruara në Gjykatë, KQZ cenon kushtet e barabarta në zgjedhje dhe ligjshmërinë e zgjedhjeve.
Kodi Zgjedhor thotë qartë se “për të marrë pjesë në zgjedhje një parti duhet të paraqesë vërtetimin e regjistrimit në gjykatë”, gjë që Bindja Demokratike nuk e ka, sepse vërtetimi i paraqitur nuk është i formës së prerë. Deri në 23 prill 2019, kur ishte afati i fundit për të dorëzuar kërkesat në KQZ, Bindja Demokratike nuk ekzistonte si parti, prandaj pranimi I saj në zgjedhje nga KQZ është i paligjshëm”, theksohej në argumentet e PBDSH.
