Postimi i fundit i menaxherit Aleksandar Jovkov e ka pështjelluar të ardhmen e Jasir Asanit te Partizani dhe te Kombëtarja shqiptare. Menaxheri i ka kërkuar trajnerit të kombëtares së Maqedonisë që të thërrasë sulmuesin nga Shkupi dhe në shkëmbimin e komenteve ai ka pohuar se në verë 23-vjeçari do të bëhet me skuadër të re.
Më 22 shtator 2017, Asani firmosi kontratë katërvjeçare me Partizanin, kështu që edhe për dy sezone është në pronësi të “demave”.
Në kontratën e nënshkruar është shënuar edhe një klauzolë për një largim të parakohshëm të lojtarit. Palët kanë rënë dakord që Asani mund të largohet para përfundimit të kontratës nga Partizani nëse paguan 400 mijë euro dëmshpërblim.
Sipas kësaj klauzole, shifra është e gjitha për të kuqtë, ndërsa menaxheri i lojtarit mund të përfitojë nga shitja vetëm nëse oferta e kalon këtë kuotë.
Klubi dhe menaxheri kanë rënë dakord në kontratë që në rast shitjeje mbi 400 mijë euro, diferenca do të përpjesëtohet në dysh mes palëve.
Pra, menaxheri është i interesuar që të gjejë një ofertë të majme, në mënyrë që të rrisë edhe fitimet e tij nga shitja e mundshme. Gjithsesi, Asani mund të largohet në verë nga Partizani edhe për 400 mijë euro, ku menaxheri heq dorë nga fitimi.
