Pas “fajin e ka Saliu”, “këto ndodhin edhe nëpër botë” është justifikimi që po përdorin në masë “Rilindasit” për të shfajësuar dështimet.
Rasti i fundit u shënua mbrëmjen e djeshme në emisionin “Opinion” nga zëvendësministri i Brendshëm Julian Hoda. Nisur nga grabitja e Rinasit, në studio u fol për mungesën e efektivitetit të Policisë për kapjen e personave në kërkim, të cilët kryejnë krime të vazhdueshme dhe lëvizin të lirë në qytete edhe pse në kërkim nga policia.
Personat në kërkim – Në përgjigjen e tij, zv/ministri tha se persona në kërkim që nuk arrestohen ka dhe në vende të tjera të botës: “Persona me 40 vjet në kërkim dhe që janë aktiv”.
Për të mbështetur tezën që artikuloi, bëri një paralelizëm me njeriun më famëkeq që ka njohur ndonjëherë mafia italiane dhe ajo botërore: “Toto Riina ku u arrestuar? Në mes të Palermos. Po Provenzano? Në zonë rezidenciale”.
Në një moment diskutimi, Hodaj iu drejtua një gazetareje në panel: Keni bërë një kërkim, nëpër botë sa (grabitje) kane ndodhur në dy muajt e fundit?
Paratë e grabitura – Numri dy i Ministrisë së Brendshme tha se me arrestimet që janë bërë dhe personat e shpallur në kërkim, grabitja në Rinas është thuajse e zbardhur. Nga drejtuesi i emisioni Blendi Fevziu iu kujtua se paratë e marra ende nuk janë gjetur. Në përgjigje, Hodaj u justifikua me ‘stilin Rilindas’: Këto ndodhin edhe nëpër botë. “Gjithandej është e vështirë”, tha ai. /BN/
