Nga Boldnews.al
Fillim maji, reshjet e shiut janë pjesë e stinës, por nuk ishte shënuar ndonjëherë që një vepër e “madhe” e përfunduar, pasi hëngri 8 milionë euro në një “b…vend”, të përmbytej e gjitha. Kjo ka ndodhur në Vlorën e kryeministrit, deputetit Edi Rama dhe të kryebashkiakut Dritan Leli.
Përveshjet e mëngëve dhe daljet para kamerave të qullosur nga uji nuk shërbenin më as për propagandën e Rilindjes. Shiu nxorri zbuluar aferat korruptive në ndërtimin e veprave që ngjajnë si makiazh i fytyrave të pudrosura të qeverisjes, lokale dhe qëndrore.
Por Leli nuk ka shumë dorë aty, e gjitha është një “vepër” sipas shijeve të kryeministrit, që nuk do tia dijë për investimet inxhinierike nëntokësore të domosdoshme, por atë që duket, sipërfaqen, bojatisjet, vijëzimet apo trotuaret.
Ish-kryebashkiaku i Vlorës Shpëtim Gjika me një gurë (status) “vrau” dy zogjtë e Rilindjes, Ramën dhe Lelin. “Sot e mësova që, “struci”, vetëm këtu në Vlorë dhe jo gjetkë, e fshehka kokën dhe nxjerr bythën zbuluar, jo kur i kanoset rreziku nga kafsha grabitqare, por kur u mbytka në ujë! Zanati thonë, o mësohet qysh vitin e parë, kur ke vullnet, pasion dhe dëshirë, ose në të kundërt, jo që nuk bëhesh dot usta, por për fat të keq, ngelesh çirak edhe po të mbajtën në punë për sevap edhe 4 vjet të tjera!”, shkruan Gjika, duke iu referuar çirak Lelit dhe “usta” Ramës.
Nuk është i vetmi qytet që shiu e nxjerr zbuluar. Tirana gjithashtu nuk i mbijeton dot as 20 minitave reshje të dendura. Rasti më tipik ishte përbytja e Bibliotekës Kombëtare, në një rast të paprecedent, u përmbyt më 23 qershor të vitit të kaluar. Mesi i verës me dhjetë minuta shi sollën katastrofën e madhe, në dëmtimin e 12 mijë librave dhe dokumenteve të tjera të rëndësishme.
Për rindërtimin e Sheshit Skenderbej janë shpenzuar 13 milionë euro nga buxheti i shtetit. Faza e parë e projekti, e cila ka kushtuar 4 milionë euro përfshinte prishjen e sistemit të vjetër të kanalizimeve dhe ndërtimin e një sistemi të ri, ku në projekt ekzistonte edhe kanalizimet nëntokësore të Bibliotekës Kombëtare.
Askush nuk mbajti përgjegjësi. Kompania “Fusha sh.p.k” e privilegjuara e përhershme e Lali Erit dhe Edit që kreu punimet, nuk u penalizma, përkundrazi, mori edhe shumë projekte të tjera.
Batërdia me shpenzimet marramendëse që nuk justifikojnë veprat e ndërtuara shpesh ua zbulon shiu aferat, ndonëse propaganda Rilindase është gati me shprehjen: “Përbytjet ndodhin në të gjithë botën…, me përmbytje bëhen edhe filma…”!
