Pas dy barazimeve radhazi, Partizani u rikthye te fitorja dhe e bëri këtë duke mposhtur bindshëm Flamurtarin në Vlorë, me rezultatin e pastër 0-3.
Pavarësisht mungesave të shumta, skuadra e Gegës ishte e vendosur mirë në fushë dhe bëri një ndeshje mjaft të mirë, duke zhbllokuar sfidën me anë të Jasir Asanit, ndërsa në pjesën e dytë vulosi fitoren me golat e Mensah dhe Çinarit.
Me këtë fitore, skuadra e Partizanit ruan diferencën prej 10 pikësh me Kukësin ndjekës dhe tashmë është vetëm dy pikë larg titullit kampion, shampanjën e të cilit mund ta hapë fundjavën e ardhshme në derbin e kryeqytetit ndaj Tiranës.
Kjo e fundit ndërkohë mori një fitore të vështirë, por me mjaft vlera në stadiumin “Selman Stërmasi” ndaj Skënderbeut. Bardheblutë triumfuan me rezultatin minimal 1-0, me një gol të shënuar nga fantazisti shkodran Edon Hasani në minutën e parë shtesë, ndërsa me këtë 3-pikësh, Tirana çon në 5 pikë distancën nga Kastrioti i vendit të parafundit.
Krutanët arritën të marrin vetëm një pikë në transfertën kurbinase ndaj Laçit, ku kaluan të parët në avantazh, me golin e shënuar nga Taulant Marku në minutën e 82-të të takimit, por vendasit barazuan në minutën e tretë shtesë, me anë të Regi Lushkjas.
Sfida tjetër e ditës së sotme, ishte ajo mes Teutës dhe Luftëtarit të Gjirokastrës, që përfundoi në barazim pa gola, një rezultat që nuk i shërben aspak asnjërës prej skuadrave. Kujtojmë që Kukësi e pati pushim, pasi duhej të përballej me Kamzën, ndërsa mori 3 pikët në tavolinë.
