Barush Bregu, 33 vjeç, lindur në Shkodër, është personi i arrestuar gjatë aksionit policor te Komuna e Parisit në kryeqytet pasditen e sotme.
“Bregu është i dënuar me 4 vite burg për kultivim të bimëve narkotike, e kryer në bashkëpunim, në vitin 2016, si dhe me masë sigurie ‘Arrest në burg’, për armëmbajtje pa leje, pasi në shtator të vitit 2018, gjatë një operacioni të zhvilluar nga Policia, në banesën e këtij shtetasi u gjet një armë zjarri kallashnikov dhe municion luftarak. Gjithashtu ky shtetas është i skeduar si pjesëtar i një grupi kriminal dhe është i dyshuar edhe si autor për ngjarje të tjera të rënda kriminale të ndodhura në qarkun Shkodër më parë, si dhe autor i dyshuar për ‘Trafikim të lëndëve narkotike’”, konfirmuan burime zyrtare nga Policia.
Bashkë me Barush Bregut një tjetër person u vu në pranga. “Po gjatë operacionit u arrestua ne flagrance dhe shtetasi B. Ç. 21 vjeç, banues në Shkodër për veprën penale ‘Përkrahja e autorit të krimit’. Materialet do ti kalojnë Prokurorisë së Rrethit Gjyqësor Shkodër për veprime të mëtejshme, për veprat penale të “Mbajtja pa leje dhe prodhimi i armëve, armëve shpërthyese dhe i municionit’ dhe ‘Kultivimi i bimëve narkotike, e kryer në bashkëpunim’,” njoftoi Policia.
Aksioni
Operacioni policor “Kompleksi” u krye nga Policia e Shkodrës, në bashkëpunim me forcat speciale RENEA, FNSH e forcat Shqiponja të Drejtorisë Vendore të Policisë Tiranë, sqaroi Policia.
Operacioni u zhvillua në lagjen “Komuna e Parisit”, ku në një banesë të marrë me qira u kap dhe u arrestua 33-vjeçari. Gjatë aksionit, u panë snajperë të instaluar mbi tarracat e pallateve. /BoldNews/
