Duke parë mungesat dhe dilemat, korçarët janë të pavendosur për formacionin bazë që do të hedhin në fushë kundër bardhebluve. Me Ditën dhe Radasin jashtë këtij takimi, Orges Shehi është në dilemë se kë të hedhë në fushë për këtë ndeshje dhe kë të kursejë për takimin ndaj Kukësit në Kupë që do të luhet pas disa ditësh.
Në të tilla kushte kur korçarët janë në diskutim për të pasur në dispozicion nga minuta e parë Muzakën dhe Taipin, duket se trajneri duhet të ketë gati alternativat për të bërë “arnimet”. Nëse do të vendoset që si Muzaka ashtu edhe Taipi të nisin takimin nga stoli, Skënderbeu do të duhet të luajë me një rreshtim me katër mesfushorë, ku vendin e Muzakës do ta mbulojë Gripshi, ndërsa atë të Taipit, Pervani nga minuta e parë. Në të kundërt, nëse janë në gjendje të dy futbollistët, do të luajnë normalisht nga minuta e parë dhe pa dyshim që Shehi do të ketë një ekip më të përqendruar dhe me më shumë eksperiencë.
/Pnaoram Sport/
