Gjergji Muzaka rrezikon që ta humbasë përballjen me Tiranën. Ish-lojtari i bardhebluve, që prej më shumë se dy vitesh luan te Skënderbeu, mund të mos jetë në fushë për shkak të frakturës që ka në hundë. Edhe pse kundër vlonjatëve luajti dhe shënoi nga pika e penalltisë, dhimbjet nuk i janë larguar.
Kujtojmë se Muzaka ishte në gjyq me ishklubin e tij për 107 milionë lekë të vjetër, pjesën më të madhe të së cilës Tirana ia ka shlyer me këste. Në të tilla kushte, Orges Shehi duke parë gjendjen e futbollistëve, mund të bëjë edhe një rrotacion të mundshëm në ndeshjen e së shtunës.
Duke llogaritur edhe mungesat e sigurta të Bruno Ditës dhe Marko Radasit që janë të padisponueshëm për shkak kartonësh, trajneri bardhekuq mund të kursejë edhe një prej shtyllave të ekipit që vazhdimisht ka pasur probleme, siç është Gjergji Muzaka pas atij dëmtimi që mori në hundë. Lojtari kryeqytetas ka shqetësime sërish si pasojë e dëmtimit dhe u desh të shtrëngonte dhëmbët në përballjen ndaj Flamurtarit. Për këtë arsye, është në dilemë për javën e 32-të.
Me 33-vjeçarin jashtë ekipit apo qoftë edhe nga stoli, shkalla e vështirësisë për transfertën rritet ndjeshëm për Skënderbeun. Por, nuk është e vetmja dilemë, pasi edhe Shqiprim Taipi nuk po stërvitet me grupin plotësisht. Gjendja e tij ka ardhur në rritje, por ende nuk është i gatshëm për të qenë në fushë nga minuta e parë. Në kushte të tilla edhe mund të mos rrezikohet nga klubi dhe me shumë mundësi do t’ia nisë nga stoli.
DY SULMUES – Pavarësisht kësaj, në kampin bardhekuq janë të vendosur që nga ndeshja kundër Flamurtarit e në vijim, ekipi të luajë vetëm me dy sulmues në fushë. Paraqitja e mirë që ekipi bëri me 4-4-2 ka i shtuar bindjen Orges Shehit, por edhe drejtuesve se ekipi funksionon më mirë me skemën klasike. Prandaj, për këtë korçarët pritet që të aplikojnë deri në fund të sezonit këtë modul.
Një skemë, e cila duket se është me e adoptueshme edhe me mungesat që do të ketë Skënderbeu në ndeshjen ndaj Tiranës. Duke parë që si Radas edhe Dita nuk janë gati për këtë takim, teksa nga ana tjetër Muzaka dhe Taipi janë në dyshim dhe mund të lihen pushim për të mos rrezikuar më shumë, Shehi me ndryshimin e rreshtimit të ekipit do ta ketë më të thjeshtë “arnimin” e ekipit për ndeshjen e radhës.
Nëse me tre mesfushorë do të ishte e vështirë të luhej pa Muzakën dhe Taipin, në rreshtimin 4-4- 2 Shehi do të alternohet mjaft mirë me Bregun dhe Gripshin në krahë, teksa Krasniqi dhe Oto Xhon do të luanin nga minuta e parë. Në këtë ndryshim korçarët kanë parasysh dy fakte. Ndërtojnë një ekip më të qëndrueshëm dhe të stabilizuar mes reparteve për ndeshjen ndaj Tiranës, por edhe ruajnë energjitë e Muzakës dhe Taipit për përballjen në mesjavë ndaj Kukësit./PanoramaSport
