Përditësuar/ Policia e Matit ka zbardhur detaje lidhur me ngjarjen e ndodhur pasditen e sotme, ku një 31-vjeçar mbeti i vdekur. Sipas policisë, Ari Hoxha ishte person në kërkim për dhunë në familje.
“Shërbimet e Stacionit të Policisë Klos morën informacion nga qyetarët se shtetasi në kërkim Ari Hoxha, 31 vjeç, lindur dhe banues në fshatin Gurrë, i armatosur po shkonte në drejtim të banesës së bashkëshortes, në fshatin Plan i Bardhë Klos. Shërbimet e Policisë të Stacionit Klos u nisën menjëherë drejt adresës ku kishin marrë informacionin për personin e armatosur, i cili ishte person i shpallur në kërkim për veprën penale ‘Dhunë në familje’. Shërbimet e Stacionit të Policisë Klos kanë kërkuar përforcime dhe kanë rrethuar në distancë banesën.
Në pritje të ardhjes së përforcimeve nga DVP Dibër, shërbimet e Policisë kanë dëgjuar një të shtënë armë zjarri. Rreth 150 metra larg banesës së vjehrrit është gjetur, dyshohet i vetëvrarë me një plumb në kokë shtetasi Ari Hoxha. Grupi hetimor nën drejtimin e Prokurorit të Matit është në vendngjarje ku vijojnë veprimet për zbardhjen e plotë të ngjarjes”, njoftoi Policia.
Ajo që bie në sy, teksa hedh një vështrim nga profili në Facebook i të ndjerit, është pasioni i tij për armët. Ka foto me kallashnikov në mes të borës, por edhe një foto mjaft e rëndë. 31-vjeçari mban në dorë një pistoletë, të cilën ja drejton edhe vetes, duke e vënë grykën e armës në kokë.
***
Sherr me njerëzit e gruas, burri vret veten
Një 31-veçar është gjetur i pajetë këtë të enjte në fshatin Plan në Klos. Dyshohet se ai ka vrarë veten me armë zjarri.
Nga informacionet paraprake, 31-vjeçari A.Hoxha, ka ndërmarrë aktin ekstrem pas një konflikti që ka pasur me njerëzit e gruas. Pasi është larguar nga banesa e familjarëve të të shoqes, ai dyshohet se ka qëlluar veten më armë zjarri.
Burime nga vendi i ngjarjes bëjnë me dije se është njoftuar policia dhe në momentin që ka mbërritur aty, ka gjetur rreth 150 metra larg banesës trupin e pajetë të 30-vjeçarit. Një grup hetimor është ngritur dhe ka nisur punën për zbardhjen e ngjarjes. Familjarë të viktimës dhe të bashkëshortes së tij pritet të merren në pyetje për të hedhur dritë mbi konfliktin e mundshëm që mund të ketë çuar të riun të ndërmarre aktin ekstrem. /bn/
