Pas fitores me Flamurtarin në kampionat, Skënderbeu është tërësisht i përqendruar te ndeshja e radhës ndaj Tiranës në kampionat. Bardhekuqtë kërkojnë vijimësinë dhe pavarësisht vështirësisë që ka ndeshja në transfertë, fitorja mbetet rruga më e mirë për t’u afruar me vendin e tretë në renditje. Për Dejvi Bregun mundësitë janë reale për Skënderbeun që të arrijë në renditje kundërshtarin dhe mbi të gjitha për të qenë në Europë sezonin e ardhshëm.
Bregu, ndeshja me Flamurtarin tregoi se ky ekip ka cilësi, por vijimësia është ajo që pengon Skënderbeun…
Po është e vërtetë, gjithë këto ndeshje nuk kemi mundur të gjejmë vijimësinë pavarësisht se kemi zhvilluar ndeshje të mira. Cilësinë e kemi dhe kjo s’ka asnjë dyshim. Kemi zhvilluar një takim gati perfekt me Flamurtarin dhe kjo na e bën më të lehtë rrugëtimin. Jemi më të qetë tani, por e rëndësishme është ajo që thatë ju. Duhet të kemi vijimësi dhe të ecim në këto ritme.
Tashmë me këtë fitore duket se u hap edhe rruga drejt Europës nga kampionati. Është e mundshme?
Skënderbeu ka pasur objektiva të qartë që në krye të herës. Mund të them se Europa ishte objektivi ynë më minimal. Nga ana tjetër duhet të synojmë të arrijmë me çdo kusht vendet e para në kampionat, pasi kjo na jep qetësi. Jemi të vetëdijshëm se arritja e objektivit është më se reale dhe në kushte të tilla përqendrimi është ai që duhet. Ndeshja me Flamurtarin ishte një sfidë kyçe që duhet ta fitonim medoemos dhe në fund e arritëm. Një fitore që është me mjaft vlera, pasi çdo rezultat tjetër na nxirrte nga gara në njëfarë mënyre.
Tani është Tirana testi i radhës. Sa i vështirë është ky takim?
Pa diskutim që është një takim i vështirë, pasi dihet cilësia dhe objektivi i ekipit bardheblu. Është një përballje mes dy ekipesh që kanë objektivat e tyre dhe normalisht që presioni është prezent. Nga ana tjetër mund të themi se gjithmonë përballjet mes Skënderbeut dhe Tiranës kanë nxjerrë ndeshje te forta dhe të luftuara.
Kujt i bën më shumë punë fitorja në këtë takim?
Ne shohim vetëm ecurinë tonë dhe objektivin që kemi për të arritur. Duhet të mos dalim pa pikë nga kjo ndeshje dhe kjo është ajo që kemi në mendje. Jemi të përqendruar për të bërë mirë dhe do të mundohemi të japim maksimumin. Më pas fusha tregon se sa mirë kemi bërë.
Nga kampionati dhe Kupa jeni në garë për Europën. Cili është më lehtësisht i arritshëm për ju?
Të dyja kompeticionet janë të mundshme për të përmbushur objektivin. Kemi një objektiv për të arritur dhe jemi të fokusuar te përmbushja e tij. Në kampionat kemi edhe katër takime për të luajtur dhe ndeshjen e fundit në tavolinë me Kamzën. Kurse në Kupë kemi një ndeshje për të përmbysur. Them se të dy janë në të njëjtën shkallë vështirësie. Por le të mendojmë për kampionatin fillimisht.
Bregu, goli duket se ju mungon disi. Sa e vështirë është të mos shënoni rregullisht?
Jo, duhet të them se jam i kënaqur me aq sa kam bërë deri tani. Dëmtimi nuk më ka lënë plotësisht të qetë dhe mund të them se tani që jam rikthyer ndihem shumë më mirë. Shpresoj që edhe goli të vijë dhe atëherë gjërat do të jenë më mirë.
