Deklarata e ish-mes fushorit francez të Skënderbeut, Arnaud Guedj, nuk ka lënë një shije të mirë në kampin korçar. Pas replikës nga ana e trajnerit Orges Shehi, dje ka pasur një reagim edhe nga kapiteni i Skënderbeut, Marko Radas.
Ky i fundit, në një prononcim të dhënë për “Panorama Sport”, ka mohuar çdo pretendim të francezit. Mbrojtësi kroat i ka mëshuar fort faktit se vetëm te Skënderbeu nuk ka dallim racor dhe aq më pak të ketë lojtarë që ndërhyjnë në zgjedhjet e trajnerit për formacionin. Sipas Radas, shembulli më i mirë është vendosja e tij si kapiten i ekipit dhe fakti që në një ekip luajnë katër të huaj nga minuta e parë, aq sa parashikon rregullorja.
REAGIMI – “Të them të drejtën, kur kam lexuar gazetën ditën e sotme (djeshme), kam mbetur i shokuar nga deklaratat e Guedj. Kjo, pasi bëhet fjalë për një lojtar që sapo erdhi te ne, u ndihmua për të qenë pjesë e ekipit dhe shumë shpejt iu dha mundësia për të treguar veten. Në këto tetë vite që unë jam te Skënderbeu nuk kam pasur asnjëherë siklet nga ajo që pretendon Guedj.
Këtu nuk ka dallime etnike apo racore. Mjafton të shohim formacionin me të cilin luajmë çdo ndeshje. Jemi plot katër lojtarë të huaj në fushë, aq sa e lejon rregullorja e FSHF-së. Dhe në disa raste trajneri është vënë në vështirësi se cilin duhet të aktivizojë. Pretendimet e Guedj janë të kota, pasi edhe pas largimit të tij nga ekipi, Skënderbeu afroi lojtarë të huaj, por që nuk ankohen, pasi mundohen të japin më të mirën në fushë. Dua të dal te fakti që mungesën e hapësirës për shkak të mosimpenjimit të tij, Guedj është munduar ta zëvendësojë me diçka tjetër”, theksoi fillimisht Radas.
NDËRHYRJA – Më pas kapiteni është ndalur edhe te multietnia e Skënderbeut, por mbi të gjitha te fakti që formacioni caktohet vetëm nga trajneri dhe nga askush tjetër. “Ne jemi një ekip multietnik, ku në përbërje kemi shumë lojtarë të huaj të kombësive të ndryshme. Pretendimet e Arnaud bien që në momentin e parë, pasi të kishte dallime racore, nuk do të isha unë kapiten i Skënderbeut.
Më pas të mos flasim për çështje të tjera. Më duket i pavend fakti që ai flet për klubin sikur të kishte qenë me kohë pjesë e tij dhe sikur i di të gjitha se si ne e përjetonim kampionatin. Skënderbeu nuk është skuadër në rënie sikundër i kanë folur, por një ekip që po ndryshon. Askush këtu nuk ndërhyn te trajneri për të mos aktivizuar lojtarë, pasi të gjithë e tregojmë se sa gati jemi për të luajtur gjatë javës së stërvitjes”, deklaroi Radas në replikën e tij me ish-futbollistin francez të Skënderbeut.
KAMPIONATI – Kapiteni i Skënderbeut është ndalur në fund shkurtimisht te kampionati dhe synimi për të qenë pjesë e Europës. Ai deklaron se mungesa për shkak kartonësh në ndeshjen e radhës ndaj Tiranës nuk do të ndihet.
“Natyrisht që më vjen keq që nuk do të jem ndaj Tiranës, por besoj se nuk do të ndikojë në rezultat. Kemi treguar se edhe me mungesa mund të funksionojmë mirë. Duhet vetëm që ekipi të jetë i përqendruar dhe i fokusuar vetëm te rezultati i ndeshjes. Objektivi është ende i arritshëm edhe përmes kampionatit. Kështu që duhet të vijojmë me paraqitjet e mira deri në fund”, përfundoi kroati, i cili bashkë me Bruno Ditën, do të jenë mungesat e sigurta të Skënderbeut të shtunën kundër Tiranës. Korçarët vijnë pas fitores në shtëpi me Flamurtarin dhe tashmë kanë shansin të afrohen me vendin e tretë./PanoramaSport
