Kush mund ta mendonte se në formacionin e Skënderbeut do të luante një mbrojtës 18-vjeçar? Stafi teknik i korçarëve i ka besuar Jorgo Pëllumbit në 11 ndeshje të këtij sezoni, 7 herë si titullar dhe 4 herë si zëvendësues. Ai ka luajtur në qendër të prapavijës, bashkë me kapitenin Radas.
Në një intervistë për “Vipsport.al”, futbollisti i ri i Skënderbeut flet për ecurinë e sezonit, paraqitjen personale dhe për ambiciet për të ardhmen:
Çfarë do të thotë të luash në formacionin e Skënderbeut në moshë kaq të re?
Është diçka shumë e mirë, që e kam pritur dhe më përpara këtë gjë, por duke parë kualitetet që ka pasur më parë ekipi, ka qenë disi më e vështirë. Këtë vit, me ndryshimet që ka pasur Skënderbeu, ka pasur më shumë besim tek unë nga drejtuesit e klubit.
Sa ju ndihmon kapiteni Marko Radas në fushë, duke qenë partneri juaj në qendër të mbrojtjes?
Radas është lider, e ka treguar gjithë këto vite në kampionatin tonë. Marr gjithmonë këshilla nga ai dhe më ndihmon shumë, duke më orientuar si në stërvitje, ashtu edhe në ndeshje.
Publiku korçar ju mbështet sa herë luani, pasi jeni ndër të paktët vendalinj, bashkë me Vangjelin. Sa ndikon kjo gjë për ju?
Eshtë një kënaqësi shumë e madhe, sepse e kam nisur me ekipet e moshave dhe për të arritur tek ekipi i parë i qytetit tim. Tifozët më japin forcë dhe dëshirë që të jap më të mirën në fushë për ekipin dhe për tifozët.
Keni një model nga lojtarët e Skënderbeut të viteve të fundit, që doni ta imitoni?
Skënderbeu ka pasur vitet e fundit shumë lojtarë cilësorë dhe me vlera. Ata kanë kontribuuar për titujt kampion dhe shpresoj të vazhdoj në rrugën e tyre.
A mund ta shohim Jorgo Pëllumbin në të ardhmen në një rol lideri te Skënderbeu, siç kanë bërë më parë korçarë të tjerë si Shkëmbi, Lilaj apo Osmani dhe tani Vangjeli?
Shpresoj që të kem vazhdimësi dhe të jem në atë nivel. Do të ishte kënaqësi shumë e madhe për mua që të jem si këta lojtarë dhe disa të tjerë.
Cilat janë objektivat personalë të Pëllumbit për të ardhmen?
Objektivi im është që dita-ditës të jap më të mirën në stërvitje dhe në ndeshjet zyrtare, të përmirësohem dhe të kem sukses me ekipin, duke fituar trofe. Shpresoj që një ditë të arrij të luaj në një kampionat më të fortë se ai shqiptar.
Si e shikon fundin e sezonit, çfarë mund të bëjë Skënderbeu në Kupë dhe kampionat?
Shpresojmë të shkojmë në Europë. Kemi cilësi në skuadër që të arrijmë rezultatet për të përmbushur objektivat që ka klubi. Dëshira ime është që ekipi të fitojë Kupën e Shqipërisë, duke marrë edhe biletën për në Europë. Do të ishte diçka shumë e bukur ta mbyllësh sezonin me një trofe. / Vipsport.al
