Skënderbeu 7 – Fitoren e vetme të javës e mori Skënderbeu, pikërisht duke thyer një Flamurtar që kishte gjashtë ndeshje radhazi në kampionat që nuk njihte humbje. Korçarët ishin më agresivë se çdo ndeshje tjetër, duke dhuruar edhe spektakël. Sulmuesi Krasniqi ishte lojtari më i mirë në fushë, duke shënuar dhe fituar një penallti.
Laçi 6 – Starova i kishte bërë një vendosje perfekte skuadrës, që jo vetëm mbrohej mirë, por thuajse në çdo dalje në sulm e kapte në befasi Partizanin. Kaloi në avantazh falë një penalltie të fituar nga Xhixha dhe kthyer në gol nga Shtubina, por një pakujdesi e mbrojtësit Mersinaj në pjesën e dytë i hoqi nga dora fitoren.
Teuta 6 – Vuan ndaj Kukësit, por falë një super-Hidi ia del të marrë pikë. Një barazim shprese në luftën për Europë, për më tepër që për shumë minuta luan me një lojtar më pak pas daljes me të kuq të Bicajt.
Tirana 6 – Para ndeshjes, trajneri Mema kënaqej edhe me një barazim, por kur shikon lojën që ka zhvilluar Tirana ndaj Luftëtarit dhe rastet e shumta që shpërdoroi, duket sikur ka lënë dy pikë. Edhe barazimi ndaj një rivali direkt për mbijetesën vjen, por bardheblutë bënë sërish “vetëvrasje”, këtë herë me një gafë të portierit.
Kukësi 6 – Luan mirë, krijon pa fund, por sulmuesit Shkurtaj dhe Rexhinaldo nuk janë në ditën e duhur për të shtyrë topin në rrjetë. Humbet një shans të artë për t’iu afruar Partizanit dhe për ta vendosur nën presion. Titulli këtë sezon është thjesht… ëndërr.
Partizani 6 – E pëson prej një vendosjeje jo të mirë në mbrojtje dhe daljes së gabuar të portierit Hoxha. Më pas krijon presion konstant, derisa gjen barazimin me penallti, madje me golin e Telushit të rikthyer. I pakuptimtë nervozizmi aq i madh te lojtarët, por mjaftojnë 24 orë për të gjetur qetësinë, pasi edhe Kukësi rival barazon.
Luftëtari 5.5 – Barazon në ndeshjen më të dobët që kur në krye të stolit ka ardhur Ahmataj, pikërisht kundër Tiranës, teksa shmang një humbje që mund ta fuste në kaos. Një Luftëtar pa ide, me lojtarë që më shumë ecnin në fushë, por edhe të tjerë që bënin veprime të çuditshme.
Flamurtari 5 – Mungesa e Veliut ia prishi planet Dajës, që u detyrua të improvizojë në mbrojtje. Luan hapur ndaj një Skënderbeu që e donte më shumë fitoren. Nuk mund të presësh më shumë nga ky Flamurtar.
*VLERËSIM I “PANORAMA SPORT”
