Mario Dajsinani është kthyer në këtë pjesë të dytë të sezonit titullari fiks i portës së Skënderbeut, duke fituar në balotazhin me Aldo Teqjen. Orges Shehi tashmë duket si i beson djaloshit i cili luan edhe me përfaqësuesen Shpresa dhe po dhuron paraqitje mjaft bindëse e të sigurta, si ajo ndaj Flamurtarit ku ekipi mori tre pikë të rëndësishme për të vazhduar luftën për Europën.
“Në çdo ndeshje, edhe më përpara luanim vetëm për të fituar sa herë hynim në fushë, por edhe fati shpesh nuk ka dashur. Shpresojmë që t’ia arrijmë të fitojmë në vijim në këto ndeshje të fundit”, theksoi ai për RTSH.
“Konkurrenca është e mirë por duhet punë që ta mbash vendin. Marrëdhënia ime me Teqjen është e shkëlqyer, nuk ka asnjë lloj diference si me periudhën kur luante ai, ashtu edhe tani që luaj unë”, vijoi portieri.
Përpara është sfida me Tiranën, një transfertë e komplikuar për korçarët, por sipas portierit një duel që mund të mbyllet me fund të lumtur. “Për vete faktin se edhe Tirana nuk është në situatë të mirë dhe ne shpresojmë që të dalim me tre pikë nga ai takim”, deklaroi Dajsinani.
