Fitorja me Flamurtarin bëri që Skënderbeu të vijojë të mbajë ritmin e duhur të kampionatit, në mënyrë që të shpresojë deri në fund të sezonit për një vend në zonën “Euro”.
Në kushtet kur bardhekuqtë mposhtën ekipin e vendit të tretë dhe mbi të gjitha treguan lojë të mirë, tashmë kërkohet vazhdimësia. Në të njëjtën linjë janë dy protagonistët e suksesit ndaj vlonjatëve. Blerim Krasniqi dhe Gjergji Muzaka, në prononcimin e tyre për “Panorama Sport”, kanë kujtuar se skuadra e tyre nuk është zhdukur, e megjithatë u bëjnë apel shokëve që të shohin përpara dhe evitojnë luhatjet.
KRASNIQI – Për sulmuesin 23-vjeçar nga Kavaja, objektivi i asaj ndeshjeje është kryer më së miri. Në deklaratën e dhënë fill pas ndeshjes për gazetën, Blerim Krasniqi e vlerëson këtë fitore si tepër të rëndësishme dhe shpreson që në ndeshjet e radhës korçarët të tregojnë të njëjtën dëshirë për fitore dhe mbi të gjitha të njëjtën lojë.
“Ishte një nga ato ndeshjet tipike, që na kërkohej me çdo kusht fitorja dhe për këtë mund të them se edhe presioni ishte i madh mbi ne. Arritëm që të përqendroheshim dhe ta nisnim lojën në mënyrën më të mirë të mundshme. Dhe starti i mirë na e bëri krejt takimin më të thjeshtë. Gjërat u thjeshtësuan më shumë për ne edhe pas golit të parë të shënuar, pasi hoqëm presionin nga vetja. Normalisht që duhet të kishim gjetur më shpejt edhe golin e sigurisë, pasi i kishim mundësitë dhe madje të shumta.
Në fund të fundit, të rëndësishme janë tri pikët dhe kjo fitore për ne mbart me vete shumë vlera. Goli i shënuar gjithmonë të bën mirë dhe sidomos për një sulmues. Gjithmonë ndihem mirë kur e gjej rrugën e rrjetës. Shpresoj që të vazhdoj kështu dhe të shënoj rregullisht. Në fund të fundit, jemi ne sulmuesit që duhet të nxjerrim ekipin përpara me golat tanë dhe kjo është përgjegjësi e jona”, theksoi Krasniqi.
MUZAKA – “Ishte një fitore që na jep forcë dhe mundësi për të shpresuar tek objektivi minimal. Një fitore që na afron më shumë me zonën europiane që të gjithë duam ta kapim”, kështu e ka nisur prononcimin e tij Gjergji Muzaka. Një fitore e rëndësishme për Skënderbeun sipas mesfushorit që “shkund” ekipin për të vijuar me të tilla paraqitje deri në fund të kampionatit. Vetëm kjo, sipas Muzakës, është rruga e duhur për të arritur objektivin minimal që ka Skënderbeu në këtë sezon.
“Ishte një ndeshje që duhej fituar me çdo kusht për të vijuar në rrugën tonë dhe ia dolëm. Përveç fitores, mund të them se loja ishte ajo që na kënaqi më shumë në këtë takim. Zhvilluam një ndeshje në nivelin më të mirë të mundshëm në këtë sezon dhe kjo është ajo që trajneri na ka kërkuar gjithmonë. Pas këtij takimi, të gjithë ne duhet të jemi më të bindur në vetvete se i kemi mundësitë të ecim shumë lart. Mjafton vetëm pak më shumë përqendrim. Treguam se nuk jemi zhdukur, por jemi këtu dhe kjo është më e rëndësishmja. Tani duhet të vijojmë kështu dhe të shohim në sy çdo kundërshtar. Duhet të luajmë me kokën lart se në fund të fundit jemi Skënderbeu. Europa është objektiv për ne dhe doemos duhet ta kapim”, e mbylli Muzaka prononcimin e tij.//PanoramaSport
