Tre persona janë në kërkim lidhur me vrasjen e dyfishtë të ndodhur mbrëmjen e djeshme në Laç. Përveç Markel (25 vjeç) dhe Vinçens Bushit (28 vjeç) në kërkim, është edhe një person i tretë, Manuel Bushi, 23 vjeç. Markel dhe Manuel Bushi janë vëllezër, ndërsa Viçens Bushi kushëri i tyre.
Vrasja e kushurinjve Mikel Jushi dhe Jani Jushi (35 dhe 30 vjeç) dyshohet se ka ndodhur pas një sherri banal, por ende nuk janë sqaruar plotësisht rrethanat. Burime zyrtare nga policia e Lezhës, bënë me dije se krimi ndodhi “pas një konflikti për motive të dobëta”.
“Në lidhje me ngjarjen e ndodhur mbrëmjen e djeshme në lagjen nr. 1 Laç, Kurbin, ku pas një konflikti për motive të dobëta u plagosën me armë zjarri dy shtetas të cilët më pas gjetën vdekjen në një nga spitalet private në Tiranë, Policia ngriti një grup të posaçëm hetimor nën drejtimin e Prokurorisë së Rrethit Gjyqësor Kurbin për zbardhjen e kësaj ngjarjeje. Menjëherë sa është marrë njoftimi, në vendngjarje kanë shkuar shërbimet e Policisë së Kurbinit si dhe grupi hetimor. Në vijim janë ngritur pika kontrolli në të gjitha rrugët që lidhen me qytetin e Laçit si dhe disa pika kontrolli në akset kryesore rrugore, Milot -Lezhë, Milot -Kurbin -Tiranë. Me mbështetjen e FNSH, janë kryer një sërë kontrollesh në banesa e vende të dyshimta ku mund të ishin fshehur autorët, si dhe janë shoqëruar në Komisariatin e Policisë, 23 persona të cilët u pyetën në lidhje me ngjarjen. Nga tërësia e veprimeve hetimore të kryera nga grupi i posaçëm hetimor, rezultoi se ngjarja ka ndodhur për motive të dobëta, pas një konflikti të çastit, dhe se autorët e dyshuar të vrasjes janë shtetasit: M. B., 25 vjeç, M. B., 23 vjeç dhe V. B., 28 vjeç, të tre lindur e banues në Kurbin. Policia e Kurbinit vijon kontrollet intensive për gjetjen dhe kapjen e autorëve të dyshuar. Materialet iu referuan Prokurorisë pranë Gjykatës së Shkallës së Pare Kurbin, për veprime te mëtejshme hetimore, për veprat penale ‘Vrasja në rrethana të tjera të cilësuara, në bashkëpunim’ dhe ‘Mbajtja pa leje e armëve dhe municioneve luftarake’, parashikuar nga nenet 79/dh, 25 dhe 278/1 të Kodit Penal”, njoftoi Policia.
Sipas një rindërtimi paraprak të ngjarjes, viktimat dhe autorët kanë qenë në të njëjtin lokal kur dhe kanë nisur të debatojnë. Dy palët më pas kanë dalë jashtë lokalit për t’u sqaruar, sherri ka agravuar dhe duke parë që autorët kishin armë me vete, dy kushërinjtë janë larguar me vrap.
Por, autorët i kanë ndjekur për rreth 100 metra Mikel dhe Jani Jushin, dhe i kanë qëlluar disa herë me pistoletë. Plumbat i kanë kapur disa herë në trup kushërinjtë, ndërsa përpiqeshin t’u shmangeshin. Mikel Jushi dhe Jani Jushi u dërguan në gjendje të rëndë për jetën në një spital privat në Tiranë për ndihmë të specializuar, ku edhe ndërruan jetë disa orë më vonë si pasojë e plagëve që morën.
Lexo edhe: Vrasja e dyfishtë në Laç, identifikohen autorët
