Dy persona janë shpallur lidhur me vrasjen e djeshme në Laç. Raportohet se Markel Bushi dhe Vinçens Bushi dyshohet të jetë autorët e vrasjes së dyfishtë.
Dy kushërinj u qëlluan me armë zjarri në lagjen numër 1 të qytetit. Bëhet fjalë për shtetasit Mikel Jushi dhe Jani Jushi 35 dhe 30 vjeç, djem xhaxhallarësh mes tyre.
“Rreth orës 20:15 në lagjen nr. 1 Laç, afer një lokali ka patur të shtëna me armë zjarri.Për pasojë dyshohet se kanë mbetur te plagosur 2 shtetas, M.J dhe J.J., të cilët janë dërguar në gjendje te rëndë per jetën në Tiranë për ndihme mjekësore”, njoftoi dje policia.
Ata u transportuan me urgjencë në Tiranë për ndihmë mjekësore, por si pasojë e plagëve të rënda ndërruan jetë në spital. Njëri nga viktimat mësohet se është pronari i një lokali në qendër të Laçit.
Sherri mes viktimave dhe autorëve nisi në lokal
Sipas disa dëshmitarëve, dy viktimat kanë qenë në lokal dhe kanë debatuar dhe konfliktuar me autorët. Këta të fundit kanë patur edhe armë me vete. Autorët i kanë ndjekur për rreth 100 metra dy kushërinjtë Jushi, të cilët kanë tentuar të largohen dhe kanë qëlluar disa herë me pistoletë në drejtim të tyre.
Plumbat i kanë kapur disa herë në trup Mikel dhe Jani Jushin, ndërsa përpiqeshin ti shmangeshin autorëve, por kanë mbetur të plagosur rëndë. Ende nuk dihen rrethanat e ngjarjes, por policia ka dyshime se ngjarja ka të bëjë me konflikte të mëparshme të autorëve dhe viktimave. /bn/
