Prokurorja e Përgjithshme e përkohshme, Arta Marku, ka dorëzuar këtë të hënë kandidaturën në KLP për postin e kryeprokurores.
Marku është kandidatja e katërt në garën për kreun e akuzës pas regjistrimit të prokurorit të krimeve të rënda Olsian Çela, prokurores së Apelit në Tiranë, Fatjona Memçaj dhe avokatit Lulzim Alushaj.
Procesi i aplikimit përfundon sot në 29 Prill, por për shkak të ditëve të pushimit shtyhet për të enjten.
Procedura
Pas dorëzimit të kandidaturave, KLP do të kryejë verifikimin paraprak për plotësimin e kritereve ligjore dhe më pas do të bëjë edhe vlerësimin e tyre me pikë. Në bazë të Kushtetutës dhe ligjit të posaçëm, KLP i propozon parlamentit të Shqipërisë 3 kandidatura për Prokurorë të Përgjithshëm. Parlamenti zgjedh me 84 vota prokurorin e Përgjithshëm me mandat të plotë.
Nëse asnjë prej kandidatëve nuk i siguron 84 vota në parlament, atëherë Prokuror i Përgjithshëm zgjidhet ai që është renditur i pari nga Këshilli i Lartë i prokurorisë. /BN/
