Artistët e Aleancës për Mbrojtjen e Teatrit Kombëtar kanë bërë me dije do të depoziatojnë padi penale në prokurorinë e Tiranës për zhdukjen e gërmave nga godina.
Në një prononcim para organit të akuzës, Robert Budina u shpreh se në Prokurorinë e Tiranës të gjithë sot ishin pushim, dhe nuk ishte asnjë prokuror i gatshëm që të merrej me çështjen. Budina tha se padia penale do të dërgohej me postë në prokurori, pavarësisht se asnjë nga institucionet nuk ka shfaqur vullnetin për të çuar para ligjit dhunuesit e pronës së teatrit.
Artistët u shprehën se ajo që ka ndodhur është një cënim i identitetit të Teatrit Kombëtar, dhe identitetit të vendit.
“Ajo godinë jo vetëm që do të ketë emrin e saj, po do të restaurohet”, u shprehën aktivistët.
“Jemi të vendosur që këtë çështje ta çojmë deri në fund, grabitësit do të vendosen përpara ligjit, pavarësisht institucioneve që janë bërë palë me dhunimin”, ishte kjo thirrja e mëtejshme e artistëve.
