Ish-deputeti demokrati Laçiano Boçi e ka quajtur kreun e qeverisë Edi Rama “kolerën e vendit”, ndërsa është shprehur se “revolta është detyrë qytetare”
Në një shënim në Facebook të titulluar “BRAKTISJA E MADHE”, Boçi ndalet te bojkoti që iu bë kryeministrit gjatë takimit në Elbasan.
“Elbasani injoron e braktis Ramën! U prit me protesta dhe iku si mi i lagur. Madje dhe administrata e vet e sjellë aty me forcë, nuk pati durimin as ta dëgjonte e as ta duronte. Nuk kishte si të ndodhte ndryshe. Elbasanit të urtë i kanë ardhur në majë të hundës harbutëria, mashtrimi dhe makutëria e plasur sheshit e kësaj qeverisje. Nën efektin e “mallit”, Rama u mundua të bënte si përherë humorxhiun e të shante si grua e ligë opozitën, para njerëzve të sjellë me autobuza në sheshin e braktisur, me ekrane modernë. Por njerëz, mos kini më iluzione! Ky është kolera e këtij vendi. Pasi e ka helmuar, e ka mashtruar, përcmuar e kriminalizuar këtë vend, kërkon ta përdhosë”, shkruan ai.
Ish-deputeti, i cili ishte pjesë e protestës së sotme në Brandashesh, ku u shty forcërisht nga policia, ka publikuar edhe një video të trishtë. Në pamje, duket mënyra mesjetare se si një çift punon tokën.
“Shiheni me vëmendje videon e xhiruar pak km larg qytetit të Elbasanit. Është ulëritëse, tragjike, revoltuese dhe e papranueshme tek e sheh. Vula e turpit e një bande-qeveri. Ky, që habitet e ankohet pse ne domosdoshmërisht duam t’i presim rrugën e marrëzisë në shekullin e 21, e ka kthyer Shqipërinë në shekujt e bujkrobërisë, sundimit të varfërisë, sundimit të llumit e antiligjit. Rama arriti të mbrehë në parmendë dhe burrin dhe gruan, siç e paraqet videoja, ndërsa rreh gjoksin paturpësisht për suksese e reforma. Kjo është Shqipëria e shekullit 21 nën Ramën. Ky është realiteti i dhimbshëm ku jetojmë, prandaj heshtja sot është krim. Revolta është detyrë qytetare! E keqja duhet shporrur”, përfundon Boçi.
