Ndeshja e radhës me Flamurtarin duket se ka motivuar ndjeshëm ekipin korçar të Skënderbeut. Në seancën e djeshme, ekipi qe në harmoni të plotë dhe i përqendruar te ndeshja e radhës. Harmoninë e shtoi akoma më shumë trajneri Orges Shehi, që gjatë seancës ka ditur si t’i marrë ekipit më të mirën e mundshme, teksa nga ana tjetër ka “dënuar” humbësit.
Gjithçka nisi me një analizë të shkurtër të Shehit në dhomat e zhveshjes. Trajneri qëndroi me ekipin për gati 10 minuta, duke ua bërë edhe një herë të qartë objektivin sezonal, i cili varet nga ndeshja e Kupës me Kukësin dhe ecuria e javëve të fundit në kampionat.
Trajneri i kërkoi ekipit që ndeshja kundër Flamurtarit të interpretohet më mirë se çdo takim tjetër, pasi është pikë kyçe për vijimin e sezonit. Kjo, duke parë edhe renditjen e kundërshtarit, që ndodhet në vendin e tretë, pozicion i cili të siguron pjesëmarrjen në Europë.
STËRVITJA- Gjergji Muzaka ka qenë i vetmi lojtar që nuk u stërvit dje me grupin. Mesfushori u përgatit veçmas, me qëllim rikuperimin e muskujve pas ndeshjes së Kupës me Kukësin. Situata nuk është problematike dhe pritet të jetë gati për nesër. Në stërvitje është kërkuar impenjim dhe përgjegjshmëri.
Nëse Shehi bëri të tijën në dhomat e zhveshjes, në fushën stërvitore dëgjohej vazhdimisht zëri i Vangjelit. Mbrojtësi korçar gjithnjë e më shumë po merr pozicionin e liderit dhe ishte ai që drejtonte ekipin në ushtrimet e ndryshme. Kritikat dhe motivimi ishin të alternuara në këshillat e Vangjelit, që nuk kursen askënd që lëshon pak nga ritmi i stërvitjes.
DËNIMET- Mungesa e golit mbetet shqetësuese te Skënderbeu në javët e fundit. Një gjë të tillë, Shehi e ka vërejtur në disa ndeshje, ndaj pjesën më të madhe të seancës së djeshme trajneri ka zgjedhur që të mbajë ekipin të përqendruar te porta. Alternime ushtrimesh, si në portë të madhe dhe të vogël, ishin specifike për të rritur saktësinë e finalizimit. Në mënyrë që gjithçka të bëhej serioze, Shehi kishte zgjedhur edhe dënimin.
Lojtarët që gabonin më shumë në serinë prej 7 minutash në një ushtrim, do të detyroheshin të bënin 10 pompa në fushë. Dënimi i motivoi më shumë lojtarët, ku nxori në pah kërkesat e Vangjelit, që ishte gati t’i tërhiqte veshin kujtdo që gabonte, nëse grupi tjetër i lojtarëve kalonte në avantazh me golat e shënuar.
VIZITA E TAKAJT- Momentet gazmore dhe me të qeshura u bënë menjëherë serioze në momentin kur në fushën stërvitore paraqitet presidenti Ardjan Takaj. Numri një i klubit u ul veçmas në tribunën e vogël dhe shihte me vëmendje çdo lëvizje të lojtarëve.
Mjaftoi vetëm kaq që Skënderbeu të fillonte të xhironte më me shpejtësi se më parë. Më pa,s gjatë ditës, Takaj do të takonte një pjesë të senatorëve të ekipit për t’i përçuar mesazhin e tij në lidhje me ndeshjen e radhës.//Panorama Sport
