Kukësi dhe Skënderbeu zhvilluan sfidën e parë gjysmëfinale në stadiumin e Kamzës. Ndeshje në fund ishte ashtu siç pritej me grintë dhe gola.
Kjo përballje zgjoi interes mjaft të madh jo vetëm në radhët e tifozëve, të cilët ishin të shumtë në numër, por dhe te personalitet e sportit, e njëri prej tyre ishte edhe Pero Pejiç. Ish-bomberi i dy skuadrave ndoqi me vëmendje përballjen nga tribuna e stadiumit.
Në prononcim e dhënë për “Panorama Sport” pas ndeshjes, kroati u shpreh se niveli i takimit të parë gjysmëfianl të Kupës ishte i mirë, por sipas tij, rezultati 2-1 e lë çdo gjë të hapur. Pejiç pohoi se takimi i ngjante një derbi, ku në pjesën e parë dominoi Kukësi, ndërsa pjesa e dytë rezultoi më e mirë për korçarët.
“E ndoqa me vëmendje ndeshjen mes Kukësit dhe Skënderbeut. Për mua ishte një takim i mirë midis dy ekipeve të mira të futbollit shqiptar. Ishte tamam një derbi. Kukësi luajti shumë mirë në pjesën e parë, por në pjesën e dytë pas pësimit të golit çdo gjë ndryshoi. Opinioni im është se Kukësi nuk duhet të ishte ndalur te 2-1, por duhet të vazhdonte të luante më fort dhe, pse jo, të shënonte sërish në 30 minutat e fundit të sfidës. Gjithsesi, ndeshja ishte e mirë edhe për Skënderbeun, i cili bëri mirë në pjesën e dytë. Sa i përket kualifikimit, unë them se me këtë rezultat çdo gjë është e hapur. Ndeshja në Korçë do të jetë e luftuar, pasi të dyja ekipet kanë potencial dhe mundësi për të arritur në finale të Kupës së Shqipërisë”, u shpreh ish-sulmuesi kroat, i cili ka dalë kampion në Superiore me të dy klubet.
