Le të shohim nga afër sesi realizohet procesi i matrikullimit. Kamera e emisionit “Top Story” u ndodh në një fermë në Elbasan. Me sy të lirë kuptojmë se janë për të matrikulluar viça dhe qengja. Veterineri i tufës shpjegon që matrikullimi duhet të bëhet në ditët e para të lindjes.
Kamera fokusoi matrikujt që përdoren për lopët dhe viçat. Kostoja e tyre, sipas veterinerit është 250 lekë për kokë. Fillimisht shfaqet procesi i matrikullimit të një viçi të vogël. Por, veterineri matrikulloi gjithashtu edhe një viç të rritur, përpara kamerës së “Top Story”-t.
Kjo është në shkelje me rregulloren, pasi kafsha nga momenti i lindjes e deri te ky matrikullim mund të ketë marrë një sërë mjekimesh, të cilat nuk identifikohen diku.
Sipas ligjit, fermeri duhet të ketë një libër të fermës, ku shënon kodin e kafshës, dhe në krah të çdo kodi identifikues duhet të shënohen sëmundjet apo trajtimet që i bëhen kafshës.
Ky libër ferme është bosh, në brendësi ka shumë pak numra identifikimi dhe asgjë të shkruar për trajtimin e kafshëve.
Pas matrikullimit të viçave, veterineri i tufës nis të matrikullojë edhe qengjat. Në momentin që po kryente këtë proces, pamë që delet ishin të pamatrikulluara. Pra, kjo tregon një proces fiktiv të matrikullimit.
“Në Shqipëri nuk bëhet matrikullim. Këtë jam duke të thënë, që fermeri nuk ka interes që të telefonojë veterinerin që të kryejë procesin e identifikimit. Kjo është një nga hallkat kryesore, që ne nuk e kemi të identifikuar kafshën që nga momenti i lindjes, e deri në momentin e therjes, kur kafsha është për konsum publik. Ne në thertore mund të kemi kafshë për therje të paidentifikuara, që theren dhe ne nuk e dimë se nga cila zonë apo fermë kanë ardhur”, tha veterineri Ervin Resuli.
Matrikullimi duhej të ishte një proces serioz, pasi përmban kartelën e analizave dhe vaksinave të gjësë së gjallë. Por, nga sa treguam më herët, matrikullimi është totalisht i manipuluar dhe bëhet vetëm për të çuar bagëtinë në thertore. Kjo, sepse ligji për veterinarinë ka vendosur kusht për thertoret, që të mos pranojnë asnjë bagëti të pamatrikulluar.
Ndërkohë që ish-ministri i Bujqësisë, Niko Peleshi në një takim konsulativ të zhvilluar me përfaqësues të shërbimit veterinar, Urdhrin e Veterinerëve dhe aktorëve të tjerë të interesuar në këtë fushë premtoi se matrikullimi do të jetë falas por ishin vetëm fjalë pasi sipas qytetarit është 250 lekë për kokë.
