Gjykata e Elbasanit dha masën e sigurisë detyrim paraqitje për kardiologun Mehmet Ibaj dhe reanimatorin Niko Thana, të cilët akuzohen për “mjekim të pakujdesshëm” me pasojë vdekjen e Rexhina Debrovës, një nënë 25-vjeçare.
Të afërmit e 25-vjeçares pretenduan se mjekët nuk kishin vepruar në kohë dhe kishin neglizhuar situatën e gruas e cila vdiq rreth një orë pas lindjes së foshnjes. Ata po ashtu ishin të pranishëm pranë gjykatës ditën e mërkurë dhe kërkuan që të vendosej drejtësi.
Mjekët nuk e kanë pranuan akuzën dhe e cilësuan arrestimin si të padrejtë, ndërsa kolegë të tyre protestuan kundër arrestimit.
Mjekët u arrestuan dy ditë më parë nga policia, pasi e reja humbi jetën në sallën e operacionit, ndërsa familjarët e saj ngritën akuza ndaj doktorëve. Arrestimi i mjekëve nga policia solli një protestë nga mjekët e maternitetit në Elbasan, të cilët e cilësuan e dënuan ndalimin si nje reagim të tepruar në një kohë kur ende nuk kishte dalë ekspertiza mjeko-ligjore.
Masa e sigurimit u kërkua nga prokurori Xhelian Seferi i cili pasi referoi para gjykatës hetimin e plotë të çështjes në ngarkim të dy mjekëve kërkoi që ndaj tyre të caktohej masa “Detyrim Paraqitje”.
Po ashtu Demir Çiftja, avokat i mjekut reanimator, Nikollaq Thano, kërkoi lirimin e menjëhershëm të klientit të tij. Sipas avokatit, arrestimi i reanimatorit Nikollaq Thano është i paligjshëm.
Avokati i kërkoi gjykatës moscaktim të asnjë mase penalizimi ndaj klientit të tij pasi ai ka kryer detyrën me korrektësi dhe nuk rezulton të ketë asnjë shkelje të protokollit të mjekimit të pacientes që fatkeqësisht për shkak të një komplikacioni tē rrallë humbi jetën pas operacionit.
Ilir Murra avokati i mjekut Kardiolog Mehmet Ibaj gjithashtu kërkoi lirimin e menjëhershëm të klientit të tij. Sipas avokatit Murraj ,arrestimi i mjekut kardiolog është i paligjshëm dhe ndaj tij nuk duhet të jepet asnjë masë.
Pasi dëgjoi palët gjyqtarja Pajtime Fetahu deklaroi në vendimin e saj se la në fuqi kërkesën e Prokurorit.
Ndërkohë që po zhvillohej procesi, para derës së gjykatës u mblodhën familjarët e Rexhina Debrovës, nënës që humbi jetën në maternitetin e Elbasanit. Ata protestuan me foshnjën e lindur para pak ditësh në duar.
Familjarët e irrituar i kanë cilësuar mjekët si kriminelë. “Kush do mbajë përgjegjësi për këtë fëmijë që do rritet pa nënë”, “Ku janë kriminelët që protestuan dje”, “Të kalben në burg”, “Të vendoset drejtësi, ndryshe ne nuk do i falim”, kanë qenë disa nga deklaratat e familjarëve.
Familjarët deklarojnë se Anxhela nuk ka pasur asnjë shqetësim gjatë shtatzanisë dhe analizat gjithashtu i kanë dalë në rregull.
Sipas informacioneve paraprake nisur dhe nga autopsia, mjekët në Elbasan kanë përcaktuar se shkak i vdekjes ka qenë “tromboembolia pulmonare”. Megjithatë do të priten rezultatet e ekspertimit mjeko-ligjor që do të përcaktojnë përfundimisht shkakun e vdekjes dhe vetëm nga ai do të zbardhet nëse mjekët janë fajtorë apo jo.
