Gjergj Muzaka është në luftë më kohën. Nëse me Laçin ishte thjesht i grumbulluar, kundër Kukësit pritet që të jetë në fushë. Dhe rikthimi i tij në mesfushë do të përkthehej me më shumë eksperiencë. Kujtojmë që 34-vjeçari ka pësuar një frakturë në hundë dy javë më parë, por edhe pse e ka marrë mirë veten, në fushë mund të zbresë vetëm me maskë. Ndaj, edhe klubi ia ka bërë gati, pasi në të kundërt do të rrezikonte shumë.
Nëse do përfshihet në 11-she, atëherë pritet që një mes Gripshit dhe kroatit Pervan të ulet në stol. Analiza – Skënderbeu nuk do blof kundër Kukësit. Kupa e Shqipërisë është kthyer në prioritet për korçarët, ndaj drejtuesit dhe stafi teknik presin që nesër të gjejnë jo vetëm kthesën, por edhe të marrin një rezultat favorizues për kualifikimin.
Për këtë arsye, seanca e djeshme e bardhekuqve ka nisur me një analizë nga Orges Shehi, i cili është munduar që t’u rrisë moralin lojtarëve. Trajneri ua ka bërë të qartë se kjo nuk është një ndeshje radhe, por më shumë se kaq. Trofeu i vetëm që kanë shans të marrin shihet si mundësi e artë për të mos çuar dëm krejt sezonin. Sezon, i cili ka pasur tepër oshilacione në radhët e kampionëve në fuqi. Për këtë arsye, durrsaku ka insistuar që çdo futbollist të japë më të mirën në fushë për t’i bërë ballë kundërshtarit.
“Ndeshja që kemi përpara ka një specifikë të veçantë dhe krejt ndryshe nga kampionati. Për këtë arsye duhet të gjejmë përqendrimin dhe të bëjmë më të mirën tonë. Nëse kjo përballje shkon ashtu siç ne duam, kemi shumë mundësi të arrijmë objektivin minimal të këtij sezoni që janë Kupat e Europës.
Kjo është ‘varka’ jonë e shpëtimit për të mos e çuar dëm këtë sezon që po luajmë. Kampionati nga njëra anë dhe Kupa në anën tjetër janë mënyrat e vetme që duhet të shfrytëzojmë në maksimum. Tani do të luajmë Kupën dhe të tentojmë të shkojmë deri në fund”, mësohet të ketë thënë mes të tjerash numri një i pankinës korçare./PanoramaSport
